Assam sorkar chuan phal lohna hmuna inbengbelte um chhuah hna a thawh mek zelah Thawhlehni khan Rengam Reserve Forest luhchilh lehin chhungkaw 230 dawn a hnawt chhuak leh a, thuneitute chuan ‘hectare tam tak dan lova luah then fai a ni’ tih an sawi.
Tun tuma beihpui thlak hi a thawh hnihna a ni a, August 18 khan Golaghat district-a Rangma Reserve Forest huam chhunga ram hectare 26 vela zau phal loh chunga luahte um chhuah tumna a ni a. An chhuahsan loh chuan an ti zel dawn tih thuneitu sang pakhatin a sawi.
“Golaghat district-a phal lohnaa awmte um chhuah beihpui thlak thawh hnihna chu vawiin khan hlawhtling taka kalpui a ni a. Rengma Reserve Forest huam chhunga No. 1 Madhupur, Rana Nagar leh Hatidubi-a chengte bitum an ni,” tiin a sawi.
Beihpui thlaknaah hian Madhupur-ah in 80, Rana Nagar-ah 44 leh Hatidubi-ah 104 tihchhiat a ni a. ‘Ramngaw huam chhung’ tia chhinchhiah hmuna phalna la hmasa lova thil din tam tak tihchhiat tel a ni bawk.
“Phal lohna hmuna awmte hnena hriattir pek tawh angin buaia awm lo zawngin a tahtawlin langtlang takin thil tih a ni zel dawn a. Hetianga hmalakna hi ramngaw tha luah thin lak letna leh a chhunga awmte inbuktawk taka an awm theihna tura tun din thar lehna tur a ni,” tiin sorkar thuchhuahah tar lan a ni.
Ramngawa phal lohva awmte um chhuah hna thawhnaah hian Special Chief Secretary M K Yadava, forest department aiawhte, CRPF, Assam Police leh district thuneitu eng emaw zat telin an enpui zel a ni.
“Beihpui thlaknaah hian state sorkar hi ram ngaw humhalhna dan lamah nghet takin a tang a, a lo luahtute um chhuaha neih let leh a tum tlat tih a lantir a ni,” tiin sorkar thuchhuahah tar lan a ni.
Sorkar hian a thawh khat nan August 2 atanga tanin ni nga chhung Assam-Nagaland inrina, Sarupathar sub-division huam chhunga Uriamghat-a Rengmaah dan lova sorkar hmun luahtute um chhuah beihpui an lo thlak tawh a. Hemi tum hian phal lohva ram luah bigha 9,000 vel la letin chhungkaw 1,500 vel, a tam zawk Muslim-te chu um chhuah an ni.
Hemi tum hian Rengma leh Doyang Reserve Forest huam chhung bitumin ram zau tak an la let a. A vaiin ramngaw humhalh lai hectare 1,400 chuanga zau an thian fai a ni.
Sorkar hian tun thla tir vek khan Golaghat-a Nambor South Reserve Forest-a phal lohva awmte um chhuah beihpui a lo thlak tawh a, ramngaw bigha 1,000 dawna zau la letin chhungkaw 350 chuang an hnawt chhuak a ni.