- Dr. C. Lalrampana
French theologian leh pastor ni bawk John Calvin-a khan Switzerland-a Protestant Reformation siamna kawngah khan a thawhhlawk hle a, a bik takin Geneva-ah a thawhhlawk lehzual hle. A inpekna leh hnathawh nghawng chuan kohhran leh khawtlang nunah siamthatna (reformation) nasa tak a thlen a ni.
Geneva-ah theocratic sorkar a din pui a, chutah chuan kohhran leh ram rorelna chu nghet tak leh awmze nei takin a inkungkaih tlat a ni. Consistory, pastor leh laymen council chuan moral discipline a kengkawh (enforce) a, khawpuia thil tih dan tur a ruahman bawk thin a ni.
Calvin chuan kohhran thununna kalphung khauh tak a siam a, chutah chuan member-te ch u nungchang lama tehfung sang tak zawm tura beisei an ni a. Consistory chuan heng standards-te hi uluk takin a kengkawh a, dan zawm lote chuan hremna an tawk a, hnawhchhuah (excommunication) pawh an tawk nual a ni. Calvin-a theological ngaihdan, a bik takin “Pathianin thil engkim a ruat lâwk sa vek (predestination)” tih thurin chuan thurin thar achu chhandamna leh mi siam a. Pathianin mimal ?henkhat dangte chu hremna atan a ruat lawk niin a ngai a ni. Hei bakah hian Calvin chuan zirna pawimawhzia a sawi uar hle a, Geneva Academy a din a, chu chu reformed theology leh zirlaite hungna (hub) a lo ni ta a ni.
Social Welfare: siamthatnaah chuan khawtlang nun siamthatna kalphung siam a ni bawk a, chutah chuan Kohhran leh State-in mi retheite, damlo leh mi harsa zawkte enkawlna kawngah an thawk ho tha hle a ni. Calvin-a thuneihna chuan Geneva leh a chhehvel a huam zau hle a, Switzerland leh a chhehvela Reformed Kohhran hmasawnna a thlen nasa hle a ni. Kohhran sawrkar, theology, leh khawtlang nun siamthatna chungchanga a ngaihdan hian tunlai Protestant leh khawtlang nunah a tha zawngin nghawng a nei chhunzawm zel a ni.
Pastor John Calvin-a beih ang tak hian tunlaia kan puithiam rualte hian kohhran, ram rorelna, khawtlang nun leh zirnaahte siam that hna han thawk tak tak seng chuan pen khat tal pawhin hma kan sawn ngei ang. Kohhran hian khawtlang nun leh mi chanhai, rethei bakberh leh damlote khaichhuahna kawngah sawrkar an thawhpui tha thawkhat hle a. Chutihlaiin ram rorelnaah hian sawrkar an thawhpui tha tawk lo niin a lang. Inthlan dawnah kohhran mipui ngah apiangin sawrkar an siamtir thei emaw tih mai tur a ni lehlawi a, zu ringawt atchilhin zu zuar lo tura intiam ngam apiang kan vote tling thin niin a lang. Hetih chhung hian ruihhlo damdawi hlauhawmah kan thalaite an lo pilbo teuh hman a. A sawh khawk kan tuar zoleh si lo. A bul atanga thuai lova a lerah kan thuai avangin “inchhirin ban a chen” tih zawng zawng kan chang zo ta. Ram rorelnaah thawhlawm leh sawmapakhat kan thlakhlelh vang nge eiruk chingte hnualsuat phal lovin kohhran rawngbawlna kawng hrang hrangah kan hawlh lawr a, chu chuan anmahniah sual ngaihzamna a neihtir a, ram pum huap mipui rilruah hlemhletna chi tha lo a tuh phah a, kan piangsual zo ta a ni.
Kohhran tinte hian sual vulh lian lovin hlemhletna rilru (moral corruption) leh induhsakna uchuak leh hleihluak tak (nepotism) thleng hian a takin dodal ngam ila. Thawhlawm thawh tam lam ringawtah rilru pe lovin takna, dikna, rinawmna leh taimakna nen Isua nungchang zemawi dik tak nen rawngbawl hna thawk ila, ram hruaitu, ram roreltu tur pawhin hlem hletna leh hming hliauna nei apiang chu hnawl fithla thak ngam ila, mahni thutiam hlenleh tak tak si lo, mipui bum ching apiang a takin hmachhawn nghal hmiah hmiah ngam ila, ram rorelna leh khawtlang nunah siamthatna (reformation) a awm thei ngei ang. Tun ang zela kan kal erawh chuan tute pawh lo sawrkarleh se, ram hruaitu mihring an danglam ringawt ang a, An khawsak dan (style) erawh a ngai reng dawn a, kan ram hian din chhuah tik ni reng a nei lovang. Chuvangin, Kohhran hi ram siamthatna kawngah an pawimawh hle a, Pastor John Calvin pawhin siamthat hna hlawhtling taka a thawh theih si chuan kan ram zimtê mihring nuai 10 awrh chauh awmna hi kan la siam tha thei a ni tih i hrenawn mawlh ang u.