Aizawl: Assembly House member-ten List of Business an hmuh khawtlai avangin sorkar department official-te an khak.
Nimina Assembly session-ah Speaker Lalbiakzama chuan zawhna leh chhanna hun an hman tan hmain, session hmasa atang tawhin sorkar official-te chu assembly zawhna leh chhanna chungchanga tan la thar turin a ngen tawh thin tih a sawi.
Speaker Lalbiakzama chuan, nizan (Thawhlehni zan) thleng khan an assembly secretariat lam an la buai tih sawiin, “Khawngaihin kan official-te tan la thar turin kan ngen nawn leh ni se la. A buaithlak thin a, democracy-ah rorelna assembly hi kan innghahna dan leh engkim rawn irhchhuahna a nih avangin i ngai pawimawh hram hram ang u,” a ti.
Leader of Opposition Lalchhandama Ralte rawn ding chhuakin, Speaker hnenah House kaltlangin official-te a ngen zing tawh a, a tuka an thurel tur, list of business pawh zan dar 12-ah pawh an la hmu thei lo chu house tihbawrhbanna nia a hriat thu a sawiin, eng sorkar department nge muang tih pawh sawi lan tha nia a hriat thu a sawi.
House Leader hnenah a remchang hmasaa chief secretary kaltlangin department che muang pawh zilhhlau turin a ngen tih sawiin, assembly house-a thawkte ni lovin sorkar department-in an chhan loh avanga thil thleng chu zahthlak a tih thu leh a ngai thutak hle tih a sawi.
INC member C Ngunlianchunga pawhin, speaker-in ‘khawngaih’ tih tawngkam nena polite taka sorkar official-te a chah nawn thin chu tha a tih loh thu sawiin, “Session neih tan ni atanga ni 15 hmain kan theh lut vek a. A chhangtu lam hi a inthlahdah a ni. Chuvangin, hei hi chu order ni rawh se,” a lo ti ve bawk.