Environment, Forest and Climate Change changtu Minister Lalthansanga’n sorkar laipuiin Forest Conservation Amendment Act, 2023 a pass chu Mizorama hmang ve tura nimina assembly session-a official resolution a put lut chu sawi ho a nih hnuah pawm a ni.
Forest Conservation Amendment Act, 2023 hi ram venhimna kaihhnawih leh hmasawnna hna thila ram chhung khawi hmun atang pawha ramri atanga mel 100 huamchhunga hma lak theihna tur a ni.
Official resolution pu luttu EF&CC Minister Lalthansanga chuan Forest Conservation Amendment Act, 2023 chu Forest Conservation Act 1980 siam thatna a nih thu sawiin, “A tum ber chu ramngaw leh leilung hausakna humhalh leh hmasawnna tluantling neih a ni a. He dan hi hman a nih dawn chuan hmasawnna hna hrang hrang thawh dawn a forest clearance-a harsatna tawh thin chu awlsam zawka chin fel theih a ni dawn,” a ti.
Sawihonaah Leader of Opposition Lalchhandama Ralte chuan, kum hnih liamta khan he dan hi dan hlauhawm a nih avangin Mizorama hman ve chi a ni lo tiin lungrual takin an lo hnawl tawh tih a sawi a. Khatih laia Oppostion Group Leader phei chuan he dan tha lo tak hi dodalna nasa zawk nei a, Mizoram pum huapa dodal tha a tih thu a sawi hial tih a sawi a. House Leader Zoramthanga pawhin Mizoram tan a him tawk loh avangin India leh MNF inremnaa ram danpui hnuaia Article 371G hmangin a dan theih ang em tih ngaihtuah a tul thu a sawi a. Hetianga na taka an dodal tawh hnua Mizorama hmang ve mai tura rawtna a awm chu tha lo a tih thu leh zirchian leh phawt tha a tih thu a sawi.
House Leader Lalduhoma pawhin August ni 4, 2023-a India President in a pawmpui, hemi hma zawngah Forest Conservation Amendment Act, 2023 chu sawi rik a awm lo tih a sawi a. President-in a pawmpui hnuah Augsut ni 22, 2023 Mizoram legisative assembly-in dodalna an pass a. Khatih laia an dodal chhan ber chu amendment act chiah an hmu a, a sawifiahna engmah a la awm loh avangin Article 371G khawih thei nia an hriat avangin an dodal tih sawiin, amah ngei pawhin a dodal tih a sawi a. November ni 29, 2023-ah notification tihchhuah hnuah, December ni 21, 2023-ah rules siam niin, hemi ni la la hian guidelines tihchhuah a ni a, an hriatchian takah chuan dodal chi a ni lo tih an hria a. Sorkar hmasa pawhin an dodalna kha ministry-ah an thlen ta lo va, ZPM-in sorkarna an chan hnuah zirchiang a, ngun taka an thlir hnuah pawm theih nia an hriat thu a sawi.