Aizawl: MPCC President Lal Thanzara chuan nakkin lawka ram hruaitu ni mai tur thalaiten ram an hmangaih a ngai tih a sawi.
Nilaini khan Congress Thalai, MPYCC chuan an pisa-ah MPCC President Lal Thanzara ‘Chawimawina’ leh ‘Thalaite Hmathlir Sawihona’ hun an hmang a. MPCC President Lal Thanzara chuan Congress party hmathlir hrang hrang leh Mizoram thalaite tana hmathlir ruahmanna hrang hrang an neihte a sawi.
Kohhran ropuinate, chhungkaw ropui leh veng chak, veng hmasawn leh veng nuam an neih chhan chu thalai rintlakte avang a nih thu sawiin Lal Thanzara chuan, Congress party-in thalai chak tak mai an nei chu Congress party mai ni lo, Mizoram tan a thlamuan thlak tih a sawi a. “Mizoram tana danglamna siam turin tun hnaiah thlalai tam tak member in neih belh nasa hle tih ka hria. Hei hian Congress party-ah thalaiin beiseina an neih leh nasat tawhzia a ti lang a ni,” a ti.
Lal Thanzara chuan Congress thalaite’n belhchian dawl leh kawng kawh hmuh zawnga hma an lak avangin sorkar tan mai ni lo, ram tan thil pawimawh a ni tih sawiin, Mizoram leh Congress hmalam hun hi an kutah a awm tih hre reng tur leh inti chak a, taimak chhuah tura a duh thu a sawi bawk.
MPCC President chuan thalaite hian ram an hmangaih a ngai tih sawiin, “Nakkin lawka kan ram hruaitu ni mai tur in la ni. Engkimah Pathian tih chunga kan kal erawh a ngai a ni. Ram kaihruai tur hian dik a ngai hle a. Eirukna leh hlemhletna laka kan fihlim a ngai a ni,” a ti.
Inkhawm hi MPYCC Sr. Vice President Ngurdingpuia Pachuau-in a kaihruai a, zawhna leh chhanna hun hman a ni.