Pakistan-a Punjab province-a tui lian nasa tak avangin mi 2,00,000 hmun himah an insaseng.
Chhanchhuah hna thawktute chuan Ravi, Sutlej leh Chenab lui lian nasa tak avangin lawngleng hmangin mi chengte an thiar chhuak a. District tam takah sipaiten an pui bawk.
A hmain Pakistani thuneitute chuan India hnena atangin tuikhuaha tuite an sah dawn tih an hrilh tih an puang a, Pakistan-a mihring an cheng tamna ber province-ah nasa takin tui a lian thei dawn tih sawi lawk a ni.
Ram pahnihte hian June thla atang khan fur ruah tam tak dawngin Pakistan-ah hian mi 800 chuang an thi tawh.
National Disaster Management Authority (NDMA) chuan lui, tui luankawr leh hmun hniam laia chengte chu insaseng hla turin a ti.
Prime Minister Shehbaz Sharif-a chuan sorkar laipuiin region thuneitute chu a pui reng tih a sawi a, a bikin Gujarat, Sialkot leh Pakistan-a mihring cheng tam ber pahnihna khawpui, Lahore-ah an buaipui nasa hle
Sialkot-ah hian darkar 24 chhunga ruah sur chuan kum 49 chhunga a tam ber tum a thleng thar tih Pakistan-a chief meteorologist-in a sawi a. Car, chenna in leh building lian tak tak tuiin a chim.
Khawpui liana cheng tam tak an tangkhang niin planning minister chuan BBC a hrilh.
Chhanchhuah hna thawktute chu thingtlang in tinah lutin mi chengte leh an ran vulhte chu lawnglengin an phur chhuak.
Lawngleng hmang hian tui lian avanga tangkhang mi 32,000 chuang chhanchhuah an ni tawh tih Reuters news agency chuan tual chhung thuneitute sawi a tar lang.
Pakistan-a disaster thuneitute chuan Nilainia tui lian hi India-in a hrilh lawka chuan ching lama tuikhuah tui sah a nih vang niin an sawi.
India hian a tuikhuaha tui khat lutuk chu a chhuah a ngai a, a chuan lam, Pakistan-a Punjab hmun zau takah tui lian a thlen ta tih thuneituten an sawi.
India-in a thenawm ram hnenah inralrinna tur a hrilh hi a thleng khât hle a, ram pahnih hi sipai chakna hmangin an innawr reng a, May thla mai pawh khan an indo a ni.