- Rinfela Zadeng
Ephesi 2:10 kan chhiar chuan – mihringte hi thil tha ti tura Pathian siam, a chhandam kan nih thu leh chu chu kan awmna tura Pathian buatsaih lâwk a nih thu pawh kan hmu. Mahse, pawi ta deuh mai chu – thil tha kan ti lo fo hi a ni awm e.
- Mi dangte ngaihsan loh
Tun hmaa kan pi leh pute rilru tak tak kha kan hre lo a, mahse ngaihsan leh entawn nei, chumi kawng zawh tura inzirtir ngar ngar thin hnam erawh kan ni. Facebook awm hnuah hian kan hnam hi kan inngaisang ta lo hle emni aw tih turin kan tawngkam leh sawizuina hmuh tur tam tak a awm ta! Mizo lemchan/film han siam se la, a siamtu leh a changtute tana inthlahrunawm ngawih ngawih turin kan inngaihnep siak emaw tih turin kan sawi zui a! Khawvel huapa lemchan thiam, sum leh pai pawh tluklehdingawn chuang senga siam lemchan te pawh hi a hlawhchham fo asin! Kan hnam tan thil tha kan ti thei lo emaw mi thil tha tih tha kan ti ve lo emaw a nih pawhin ngawi ngam khawpa mi huaisen hi kan mamawh chho ta hle mai!
- Nun hahthlak
Zaithiam leh kawng hrang hranga mi hlawhtlingte lawmpui duh lo leh ngaisang duh lo lui ngar ngar, an chet chhiatna leh an mawi lohna zawng reng renga hun hmang emaw tih tur khawpa mi chanchin hmelhem lai sawia buaipui tlat te hi a awm theih a. Hetiang mite tluka nun hahdam lo leh nun hahthlak hi an awm âwm lo e. Fiamthu leh thil nuihzatthlak, a tawngtu leh a tuartu tan pawha nuih pui bâwk bâwk tur thil hi chu a awm ve vek a, chutiangah chuan hlim takin i nui ang u. Mahse, mi tana zahna leh an hmuhnawna an hriat nawn duh loh tur thil phawrh chhuah sak zawnga fiamthu thawh te, chutiang châng reng renga camera nen inring rengte nun hi – thil tha ti tura buatsaih nun chu niin a lang lo. Hetiang nun hahthlak leh chawl lo, mi dangte el leh er, deu leh dem, sawi leh sêl reng renga dam chhung rei lote han hman ral bîk hi chu a âtthlak deuh a ni tiraw? Chutiang tan chuan nun hi a hahthlak dawn em em a, vanduaithlak taka cancer natnain a la tlakbuak zui hlauh phei chuan a hrehawm dan tur chu ngaihtuah zui ngam pawh a ni lo zawk. Nang erawh chu, chutiang mi chu ni ve suh.
- Thalaite leh thil tha tih
Thalaite hi kan phak tawk theuha thil tha leh tangkai, kohhran, ram leh hnam, chhungkua leh mi mal tan pawha thil tha ti tura beisei kan nih laiin, a tha lo lam leh a mawi lo zawk thehdarh leh put darh kawnga kutzungpui hmang tangkai hmasa pawl kan ni thin hi chu kan in hmeh lo hle. Mi beiseina leh tumruhna vaw chhe vek thei zawngte, mi tana thil tiha hma lak zel pawh nuam tawh lo rawk khawpa Social Media lama kan inchilh zui vak vakte hi sim ila, thil tha pakhat tal kan ti ve a ni mai. Dr/IAS/MCS adt kan ni vek thei lo a, kan ni vek dawn lo. Mahse kan phak tawkah, kan ni tin nunah leh kan bula mi te leh keimahni tan ngei pawh hian thil tha tih tur hi chu a awm reng a ni. Keini thalaite hian thil tha kan tih tlat chuan kan nu leh pate leh kan tu leh fate chuan min entawn ngei dawn a. Tun kan awm danah hian kan thlahte atanga chhuan lo la awm zel turte hnenah hian eng thil tha nge kan hnuchhiah tih te hi inzawt teh ang u.
- Kan chanchin leh thil tha
Mi hausa ber leh mi reithei ber pawh hian thlanmual kan intawm a, chapo thei tumah kan awm lo. Kan thih ni leh a hnulamah hian kan chanchin hi engtin nge an sawi zui ang? Kan chhungte an hmaizah vang chauhin kan chanchin hi dawt tlem nena phuahbelhin an sawi zui a ngai ang em? Thil ropui leh khawvel hriat khawpa chanchin ropui leh thil tha tih chu kan nei ve ngai hauh lo ang. Mahse tu te emaw talin an lo hriat emaw Pathian emaw talin min hriatpui, keimahni ngei pawh min ti lâwm ru veng veng thei thil tha tih te hi kan nei ve em? Ka vanduaina chhan hi chu mi kha mi thil tha lo ka tih vang kha a ni tih ruk ngai khawpa thil tha lo ti tawh te pawh kan ni thei. Mahse thil tha ti tur hian bul kan tan nghal thei reng a ni. Rei lo te khawvela kan dam ve chhunga thil tha pakhat tal han tih ve loh ngawt chu a pamhmai mah mah a ni traw?
Rilru han tih that luih tlat te, mi han ngaihdam luih tlat te, mi thil tha tih han fak luih tlat te, rilru zau tak han put luih tlat te, hlim taka nuih han tum luih tlat te hi, phur taka mi dangte tana thil tha lo, mahni tan pawha thil tha lo tih ai chuan a la hrisel zawk ta hrim hrim a ni. Sum leh pai neih loh vanga rethei, kan neih chhun kan rilru pawh la ti rethei zel duh khawpa mi rethei nih hi chu i duh lo ve tak tak teh ang. Mi dangte tan thil tha kan ti thei lo a nih pawhin thil tha lo hi tih sak lo tal ila, chu chu an tana thil tha kan tihna a ni nghal bawk ang.
Pathian kutchhuak zinga a tha ber – masterpeice – keini hi thil tha ti tura siam leh buatsaih kan ni a, chu chu kan phak tawk theuha hlen tumin hlim takin bul i tan teh ang u.