India mipa football team chu coach thar, Khalid Jamil enkawlna hnuaia an game hmasa berah an chak nghal a. CAFA Nations Cup an khelhah ranking-a sang zawk, Tajikistan chu 2-1 in an hneh.
World No. 133 India tan hian defender pahnihin goal an thun a, goalkeeper Gurpreet Singh Sandhu a che tha hle a. Theihtawp chhuahin an tang bawk a, a thlengtu ni bawk, World No. 106 Tajikistan hi an hneh theih phah a ni.
Inkhelh tan atangin mikhual team zawk an che chhe lo viau a, tlar hma lamah beisei an pha lo chungin defender pahnihin an chhanhim a ni.
India hian goal hniha hma an hruai hnuah nawr zui lova an inven hnuah mual neitu lam hian an si phurh sut tumin an nawr nasa a, minute 23-ah an hlawhtling ta nge nge a. Sheriddin Boboev chuan Shahrom Samiev chu ball tha zet mai a pe a, hei hi tlanpuiin India goal-ah chuan a thun a, 2-1 a nih theih phah a ni.