Aizawl: Mizoram IGP H Ramthlengliana chuan Myanmar atanga Mizorama ruihhlo lut zingah za zela 10 vel chauh man a nih thu a sawi.
Mizoram Home department leh Central YMA hmalaknaa Mizorama ruihhlo lut zel tur venna kawnga beihpuithlakna, ‘Special Operation’ neih mekah Mizoram IGP H Ramthlengliana hovin Champhaia tlawmngai pawl hrang hrang hruaitute leh VC te chu Zirtawpni khan Champhai Vengsang Branch YMA hall-ah an inkawm.
An inkawmnaah Mizoram IGP H Ramthlengliana chuan, Home Minister K Sapdanga kaihhruaina hnuaiah ruihhlo tihrem a nih theihna tura hmalak mek a nih thu sawiin, Myanmar atanga ruihhlo lo lut zingah za zela 10 vel chauh man a nih thu leh ruihhlo chu nasa zawka do a tul thu a sawi.
H Ramthlengliana chuan Champhai chu ruihhlo tawlhna luhka lian ber a nih thu sawiin, kum 2024 chhunga Narcotics case an ziah luh 370 zinga 170 chu Champhai Police ziah luh a nih thu leh August 10, 2025 thlengin thubuai 150 chuang ziah luh zing zaa 50 aia tam chu Champhai district-a ziah luh a nih thu a sawi a, ruihhlo do kawngah Champhai mipui leh khawtlang hruaitute chu tanrual a tul thu leh theihtawp chhuahpui turin a sawm.
Mizorama ruihhlo lut hian khawvel hmun hrang hrang a dengchhuak tawh tih sawiin ramria venhim hna thawktu Assam Rifles-te chu ramri-ah tak tak ni lo an duty avangin duh duha inkal pawh theih a ni a, hei hian ruihhlo venna kawngah harsatna a siam thu a sawi.
H Ramthlengliana chuan ruihhlo lo lut tur venna kawnga khawtlang hruaitute thawhpuia an tha tichak turin Police 32 tirhchhuah an nih tur thu a sawi a. Tun hnaiah Myanmar lam miten ramri kana Vanzau VC te an rawn vau chu an ngai haw hle tih sawiin, hetiang thil hi thleng tawh lo se a duh thu a sawi bawk.
An inkawmnaah hian Central YMA Asst. Secretary Fabian Lalfakawma leh NGO hrang hrang aiawhten thu an sawi ve bawk.
Myanmar atanga ruihhlo rawn lut venna beihpuithlakna ‘Special Operation’ hi September thla atanga December 31 thleng kalpui tura ruahmanna siam a ni. IGP ho hian Champhai district chhunga ramri hnaih khuate an tlawh a, ruihhlo lo lut tur venna kawnga hmalak dan tur hi khawtlang hruaitute nen an sawi ho zel a ni.