Indonesian President Prabowo Subianto chuan China-a SCO Summit 2025-a tel a tum chu an rama dan siamtute hlawh chungchanga lungawi lohna nasa tak lantir mek avangin Pathianni khan a thulh.
Jakarta khawpui pumah lungawi lohna lantir niin mi pathum vel thi an awm tawh a, in leh vantlang thil tam tak tihchhiat a ni bawk.
Kar liam ta atanga lungawi lohna lantir hi a boruak a len zel avangin social media platform Tiktok chu live-broadcast-na tihtawp a ni a. Bloomberg chuan stock leh an pawisa hlutna pawhin a tuar tih a sawi.
Indonesian parliament-a member, NasDem party hruaitu, Ahmad Sahroni-a chenna in chu rawk a ni tih Detik.com chuan a tar lang a, president-in inbengdai tura a ngennain zawm a la hlawh lo.
Fiamthu thiam, politics khel zuia National Mandate Party hruaitu ni ta, Eko Patrio in pawh rawk a ni tih sawi a ni.
TikTok thupuangtu chuan Inrinni khan an live theihna bik chu tharum thawhna thleng avang hian ‘tihtawptir’ an ni tih a sawi.
Mipuite lungawi lohna hi tun hnaia dan siamtute hlawh tihsan leh hna vang leh mi dang hlawh sang thei lo atanga intan a ni a. Zirtawpnia police armoured vehicle-in motorcycle taxi sua a khalhtu a thih hnuah boruak a lian zual a ni.
President hian taxi khalhtu hi an chenna inah tlawhin a nu leh pate chu a thih dan chhui ngei a tiam niin Reuters-in a tar lang.
Inrinni khan regional parliament building hal a ni a, mi pathum thiin mi dang panga an hliam.
Tual chhung chanchinbute chuan Jakarta-ah hian inkalpawhna hmanrua pawh tihchhiat a ni hlawm tih an sawi a. Lungawi lohna hian Bandung leh Yogyakarta khawpui pawh a kang kai.
Tharum thawhna thleng nasa tak avangin Jakarta-a US, Japan, Australia, Singapore leh ram dang tam tak chuan an embassy-a thawkte chu punkhawmnaa tel lo turin an ngen.