Home Minister K Sapdanga’n Kolasib district-a Assam ramri a tlawh a, Mizorama rel lut turah Inner Line Permit (ILP) pek chhuah kawngah fimkhur lehzual a tul thu a sawi.
Zirtawpni khan home minister hian Bairabi, Phaisen, Bilkhawthlir, Saiphai, Saihapui V leh Vairengte a tlawh a. Bairabi Sub-Divisional huam chhunga ILP check gate, police station leh rel station te tlawhin an hmalak dan a enfiah hmasa a ni.
Bairabi Sub-Divisional office-ah khawtlang hruaitute, sorkar official-te leh tlawmngai pawl hruaitute nen inkawmhonaah Mizorama rel kawng thar September 13-a hawn tura ruahman chu hmasawnna ropui tak a nih rualin he hmasawnna hian state dang atangin mikhual tam zawk luhna kalkawng a hawn zausak dawn a, chumi piah lamah a let zawnga ruihhlo lo luhna kawng pakhat a nih theih avangin dan hnuaiah Mizorama rawn lutte fel fai taka chhinchhiah an nih theih nan ILP pekchhuah kawngah fimkhur zawka hma lak a tul thu a sawi.
An inkawmhonaah hian Bairabi khawtlang hruaitute chuan tuna Bairabi ILP Check Gate a hman mek chu Covid-19 len laia screening point-a hman thin a nih thu leh temporary ILP Check Gate-atan a hman chhunzawm a nih dante an sawi a. ILP Check Gate chu sorkar hnuaia dan anga changtlung zawka din a nih thuai theih nan hmalak a tul thu te, ILP Check Gate hela Tlawng dung atanga Mizoram lut thinte dan nan ILP check gate awm a tulzia leh Bairabi leh a chhehvela hnam dang in awmhmun an khuar thinte dap chhuah kawngah sorkarin chak takin hma la se an duh thu home minister hnenah an thlen a. Hei bakah hian state dang atanga dan lova lo lutte leh dan phal loh bungrua lutte chak zawka dapchhuah leh ven dan an sawi ho bawk.
Thutkhawmah hian Home Secretary Vanlalmawia chuan Mizorama rel lut tura avanga sorkar inbuatsaihna hrang hrang sawiin railway police din chungchanga sorkar ruahmanna hrang hrangte, ILP Counter kalpui a pawimawh dan leh ruahmannate, hemi chungchangah inzirtirna neih dan tur ruahmanna siam a nih thu te a sawi a ni.
Home minister-in ramri a tlawhnaah hian Deputy Speaker Lalfamkima, Advisor to CM pahnih, TBC Lalvenchhunga leh Lalmuanpuia Punte, Home Secretary Vanlalmawia, DC Kolasib Robert C. Lalhmangaiha, AIG(OPS) Lalthangpuii Pulamte, SP Kolasib David H. Lalthangliana leh Commandant 1st Battalion IR Mualvum, Central YMA leh Kolasib Sub Hqrs YMA hruaituten an tawiawm a ni.