Aizawl: AH&Vety department leh ICAR-CIRG tangkawpin an buatsaih, 3rd Mithun Day leh National Seminar on Integrated Mithun Farming, Thenzawla neih chu nimin khan Chief Minister Lalduhoma’n a hmanpui.
Chief Minister Lalduhoma chuan sial vulh hi hmar chhak state mipui tam takte nunphung nen an inzawm tlat tih a sawi a. Mizo hnam nunah pawh dinhmun pawimawh tak luahtu, hausakna tehkhawng atana hman thin a ni a. Tun thlengin chhungkaw tam takin eizawnna pengah sial vulh an la kalpui a, khaw 41 velah an uar zual tih sawiin, “Sial hlutna hi a tlahniam thei lo va, kan eizawnna kawngah dinhmun pawimawh tak a chang zel,” a ti.
Mizoramin kum tinin Rs vbc 630 hu sa lei nan a hmang thin a, chu chu sa 21,000 MT hu a ni tih sawiin chief minister chuan, “Heng atang hian vbc Rs 40 chu sa lak luh nan a hman a ni a, hei hian sa leh arui thar chhuah lamah kan intodelh a pawimawh zia a lantir,” tia sawiin, Handholding Scheme Pilot Phase -ah pawh Loan Component-ah mi 3,647 leh CM Special Package-ah mi 13,019 te chuan ranvulh lama hmalak an dil tih a sawi.
Inkhawmah hian khualzahawm pahnih AH & Vety Minister C. Lalsawivunga leh Gabriel D. Wangsu, Agriculture & Allied Minister, Arunachal Pradesh te pawhin thu an sawi bawk.