Aizawl: MNF Legislature Party Secretary Er R Rohmingliana chuan assembly session neih zawh taka sorkarin official resolution, Forest (Conservation) Amendment Act, 2023 chungchang chu sawi ve thei lo tura phuar ruk an nih thu a sawi.
Thawhtannia Mizo Hnam Run chhung inkhawmah thusawiin Torang bialtu MLA Er R Rohmingliana chuan, Forest (Conservation) Amendment Act, 2023 adopt tura sorkarin official resolution an dah thut kha mak a tih thu sawi a. Bill pali lutte kha chu a hma daiha an pek thu leh an zir chian hman thu a sawi a. Chutihlaiin, he adopt tur resolution chu August ni 27 a sawiho tur kha August ni 26 zanlai velah an dah chauh a, an mut hun an nghak ni maia a hriat thu a sawi.
Er R Rohmingliana chuan, “Kei phei chu zanlai pelh (zing lam)-ah ka chhungte kai thovin an lo pe a, ka kal dawnah ka chhungten min pe ve chauh a, en pawh ka en hman lo hrim hrim. Adopt tur Resolution an rawn dahah hian Amendment Rules & Guidelines leh Principal Act pawh dah a ni lo hrim hrim. Resolution lut tur dah a ni a, zir chian ngaihna hman a awm lo reng reng. Ka MLA puite chuan House-ah an hmuh khan 8th Assembly-ah an lo chai hrep tawh thu leh an hnawl tawh tih an hrechhuak a, sawi theiin an awm ta hlek zawk a. Inrawn hona hun pawh kan nei lo. Mahse, kan aiawha sawiten an dodal a, keini chuan kan tawm pui vek, pass dawn pawh khan ‘remti’ kan ti ve lo reng reng a, chhuah erawh kan chhuak tau hran lo. Inrawnkhawm hman kan ni lo,” a ti.
Chief minister in an enchian tur thu sawi a, a him loh chuan en that leh tur tiin sawi mah se, adopt tum rukna a awm nia a lan tlat thu sawiin Er R Rohmingliana chuan, “A chhan chu, resolution tur hi Cabinet-in May ni 13 khan Agenda No 1-ah lo dah daih tawhin, khami ni khan an lo approve daih tawh a, chu chu kan hmu thei mai si lo va, tun tumah ka han zawng hmu ta chauh a ni,” tiin, House-ah adopt tura hma an lo lak ruk daih tawh thu te, resolution hmu tlai a Principal Act, Rule Amendment Copy-te anmahni an pek ve loh avangin sawi ve vak thei lo tura phuar ruk an nih thu a sawi.