Portuguese manager Jose Mourinho chu Turkish club Fenerbahce chuan Champions League atanga pet chhuaha an awm hnuah an bân.
Season thar bul tanna la rei lo viau mah se Fenerbahce chuan kum khat chuang hret chauh an la chhawr, Mourinho hi an bân tho a. Champions League qualifier-ah Benfica an hneh lo a, an chak loh atanga ni hnih hnuah Turkish club hian an bân zui ta a ni.
Fenerbahce chuan thuchhuah an siam a, “2024-2025 season atanga kan head coach Jose Mourinho nen kan inthen fel ta. Kan team tana a thil tih tawh zawng zawngah lawmthu kan hrilh a, a hma hun zel turah hlawhtling zel turin duhsakna kan hlan,” an ti.
Mourinho hian a hmain Porto, Chelsea, Inter Milan, Real Madrid, Manchester United, Tottenham Hotspur leh Roma a lo enkawl tawh a. June, 2024 khan Istanbul panin nomawi la thei lo, Fenerbahce chu lakpui ngei tura a beisei a ni.
Portuguese coach kaihhruaina hnuaiah hian league-ah pahnihna an ni a, Galatasaray an champion a ni.
Istanbul-a a awm chhung hian chanchin neuh neuh a ngah leh pek hle a. April thla khan Galatasaray nen Turkish Cup-a an inkhelh tumin hian lehlam coach Okan Buruk chu a hmaiah a tham a, a hnar a herhsak a. League-a an inkhelh tum pawhin Turkish referee-te a sawisel nasa hle a, fourth referee phei chu ‘tan bik nei’ ti hialin a puh a ni.
Galatasaray chuan goal thun loa an inhnehtawk tumah hian Mourinho lakah thubuai theh luh an tum thu sawiin, chi inthliarna lam hawiin a tawng tiin an puh a. Mourinho chuan an puhna hi a pha a, Galatasaray chu a khing let hlauh a, an club thil an tihchhiatsak rulhna tur £41,000 chawi turin a phut a ni.
Mourinho an lak luh khan Fenerbahce chuan kum 2014 hnua league title an lak hmasak ber tum tawn theih an inbeisei hle a, Galatasaray rorelna tihtawp an tum a. Kum khat hnuah pawh an beisei trophy chu an la thei ta chuang lo a, chu mai ni loin an hmelma lian ber an hneh thei ta chuang lo a ni.