Aizawl: Home Minister K. Sapdanga’n nimin khan a pisaah Mizorama ruihhlo do beihpui thlakna tur a khuh hawng.
Home minister chuan Mizoramah ruihhlo a hluarin ruihhlo in nasa takin a tibuai mek a. Ruihhlo hluar hian khawtlangah harsatna tam tak a thlen mek avangin ruihhlo hluar do let tur hian Mizoram sorkar leh Central YMA te chuan theihtawp an chhuah reng a. Chutih rual chuan, awmze nei lehzual a ruihhlo dona kawnga hmalak a nih theih nan Mizoram sorkar chuan ngaihtuahna nasa taka a sen thu a sawi.
Ruihhlo laka ram a him theihnan September 2025 atanga December 2025 chhung hian Mizoramah Ruihhlo Dona Beihpui (Operation Against Trafficking and Use of Drugs and Narcotics in Mizoram) kalpui tum a nih angin, September ni 1, 2025 hian a khuhhawnna hun hman a nih thu a sawi.
He hunah hian Excise & Narcotics Minister Lalnghinglova Hmar, Home Department Secretary, IGP (L&0), Aizawl DC leh SP bakah Excise & Narcotics leh Police hotute bakah Central YMA hruaitute pawh an tel a ni.
August ni 7, 2025 khan Mizoram sorkara Home Department, Mizoram Excise & Narcotics Department, Mizoram Police, SIB te leh Central YMA hruaituten awmze nei leh zuala ruihhlo do anih theihnan meeting neiin, uluk taka sawihona leh inrawnna neih a ni a. He meeting-ah hian Mizorama ruihhlo lo lut te hi Burma lam atangin a hlawmin a rawn lut a, chung a rawn luhna hmun 22-te pawh tarlan a ni.