Aizawl: MPCC Treasurer Dr Lalmalsawma Nghaka chuan Zoram mamawh ber chu mipuite hian an harsatna atanga hruai chhuaktu tur an mamawh tih a sawi.
Thawhtannia an party pisa-a Congress party-in chhung inkhawm an hmanah thusawiin Dr Lalmalsawma Nghaka chuan, ZPM sorkar an hranw mekte hi ram inrelbawlnaa an hlawhchham chian zia a lang tawh tih a sawiin, “Inthlan hma khan vanram siam thei tluka insawiin an campaign a, nimahsela, kan ram hi a rum zualzel si a ni. Ruih hlo avanga kan thalaite an buai nasat zia thlirin, tunah chuan kan ram hi mafia city a ni ang tih a hlauhawm ta rum rum mai,” a ti.
Zoram mamawh ber chu mipuite hian an harsatna atanga hruaichhuaktu tur an mamawh tih sawiin, ram damna tak tak tur hi Pathian kutah innghat zelin, mipuite rawngbawl leh thei turin Congress party-te hian taimak, rinawm leh huaisenna nena hma an lak a ngaih thu leh Pathian malsawm tlaka an nun an uluk hle a ngai tih a sawi.
Dr Lalmalsawma Nghaka chuan, “Kan ram hi a dam lo takzet a ni tih kan pawm a ngai tak zet ta a. Kum 20/30 kaltaa kan hruaitute kha kan mawhphuh zel a rem tawh lo ang. Vawiina mite hi a mawhphurtute kan ni a, tu dang nge kan mawhpuh tak ang?” tiin, ram dam lo mek hi Congress Party lo chu damna pe thei an awm lo a ni tih Zoram mipuite hian an pawm a ngam a ngai a. Zoram Dam Lehna Policy kengtu an ni tih a chiang chho zel dawn tih a sawi.