AZL: Hulhliap – Short Stay Centre, Neihbawi puala buatsaih, ruihhlo ngai dam mekten a thlawna thiam thil an zirna, Skill Training Programme chu nimin khan Social Welfare Minister Lalrinpuii’n MFM Skill Training Centre, Dawrpui Vengtharah a hawng.
Skill Training thawh khatna hi Hulhliap – Short Stay Centre Course zo, batch khatna leh batch hnihna te pual niin, mi 84-in thiam thil zir tura ruahman heng, aluminium fabrication, assistant electrician leh basic food processing course te an zir dawn a. Discipleship Training Institute-ah Pathian thu zir tur an awm bawk.
Aluminium fabrication leh assistant electrician hna hi Mission Foundation Movement (MFM) Centre, Dawrpui Vengthar-ah September 1-15, 2025 chhungin zirtir an ni ang a. Basic Food Processing Course hi Mizoram Food Processing & Research Centre, Seling-ah riahchilhin September 2-5 chhungin zirtir an ni ang.