Aizawl: Aizawl City College Joint Students’ Union hruaitute chuan nimin khan Chief Minister Lalduhoma chu a pisaah kawmin, zirlaite scholarship la sem theihloh chungchangah leh Forest Conservation Amendment Act dodalna awm chungchang an zawtfiah.
An inkawmnaah Chief Minister chuan scholarship chu sem anih thuai theih nan hma an lak mek thu a sawi a. SNA SPARSH avanga budget sanction theihloh pawh One time exemption Central lamin an pek phal tawh thu a sawi a. Central lam ngen angin DO letter thawn thlak nghal a nih tur thu a sawi.
ACCJSU hruaitute chuan scholarship chungchangah a rang thei ang bera zirlaiten an dawn theih nan theihtawp a hmalakpui a, vilzui pui reng turin chief minister an ngen.
FCAA chungchangah Chief Minister chuan Article 371G rahbehna anga sawi a awm chu thudik lo anih thu a sawi a. Article 371G hi a duangtu zingah a tel avangin a hriatchian thu a sawi a. Sorkarin an ngaihtuah ber chu mihring hmasawnna a ni a, ramngaw leh ramsa te nei teuh mah se, ram mipuite himna a derthawn a, an dinhmun a that siloh chuan awmzia a awm lo tih a sawiin, Mizoram leh hnam hmasawnna atan FCAA an pass ta chu a that zawk thuin ACCJSU hruaitute hi hrilhin, ZPM chu Mizo mipuite hmangaih tak taktu an nih avangin, Mizoram tana thalo chu engmah an tih ringlo tura Mizoram mipuite a duh thu a sawi bawk.