Aizawl: FOCUS 2.0 hmalakna tura thuneitu sang, Society for Climate Resilence Agriculture in Mizoram (SCRAM) te chu an Chairman Lalduhoma, Chief Minister hovin nimin khan an thukhawm a, FOCUS 2.0 hmalakna hi Handholding Scheme nena kal dun tura kalpui leh an remti.
Planning & Programme Implementation Department Conference Hall-a thutkhawmah FOCUS 1.0 hnathawh hun chhung a zawh tawh avangin Mizoram sorkar chuan FOCUS 2.0 hmalakna hi Handholding Scheme nena kal dun tura kalpui leh a remti a. International Fund for Agricultural Development (IFAD) sum Rs. vbc 380 hman phalna hi State sorkar Finance Department chu pe tawhin, sorkar laipui lamah dilna thehluh mek a ni.
Department hrang hrangten hma an lakhona a nih angin Planning & Programme Implementation Department hnuaia kalpui tur a ni ang.
FOCUS 2.0 thuneitu sang ber Governing Council thar dinna Notification hi August ni 20 khan tihchhuah niin, a hming hi ‘Society for Climate Resilient Agriculture in Mizoram (SCRAM)’ a ni a. Chief Minister chu Ex-officio Chairman niin, Planning Secretary chu Ex-Officio Member Secretary a ni. FOCUS 2.0 hi kum ruk chhung kalpui tur a ni ang.
Thutkhawmah hian FOCUS 2.0 project mil turin kalphung thenkhat thlak leh nihna hming thenkhat thlak an rem ti a. FOCUS 1.0 atanga bungrua leh hmanruate chhawm chhoh dan turte an rel a, state level leh district level-a thuneitu turte, village level-a thuneitu turte an rel a, hnathawktu tur pawh khawm dan tur leh a tul anga lak dan turte pawh an sawi.
FOCUS 2.0 hi district 11 a khaw 700 tuama chhungkaw 75,000 huama kalpui tur a ni a. Ram nei lo chhungkua pawh chhungkaw 7,000 bitum siam a ni. A chhawrtu zatve hi hmeichhia ni thei tura duan a ni bawk.
Thutkhawmah hian Agriculture Minister PC Vanlalruata, Land Resources, Soil & Water Conservation Minister Lalthansanga, Adviser to CM pahnih TBC Lalvenchhunga leh Dr. KC Lalmalsawmzauva, Chief Secretary Khilli Ram Meena bakah member dangte an tel.