Aizawl: Chief Minister Lalduhoma hovin a pisa-ah nimin khan Adviser to CM TBC Lalvenchhunga leh Finance Department thuneituten IFMIS chungchang an sawi ho.
Chief Minister chuan Finance department leh Taxation department hi chhunfin ni tawh mah se, taxation thil bikah hian amah pui tura Minister Dr. Vanlalthlana ruat a nih thu sawiin, “GST Council Meeting lo awm turah pawh hian a kal dawn a ni. Chuvang chuan, taxation lam thilah chuan Dr. Vanlalthlana hnenah file kaltir zel tur a ni,” tiin Finance department hotute a chah.
Thutkhawmah hian IFMIS-a Works Account dah tel dan tur zirchiangtu, Study Team for Cheque Payment under IFMIS te report ngaihthlak niin, Rothuama Tochhawng, MFAS, DD, Secretary, Study Team chuan state te kal dan an zirchianna report hi a pe a. Rawtna an neihte pawh a thlen nghal. Heng an rawtnate hi a tul anga an sawiho hnuah a bawhzui zel dan turte ruahman a ni.