Aizawl: January 11, 2025-a Thingkhuang ngaw puk, Khawlek, Saitual district-a mihring ruhro hmuh chhuah chu kum 700 chuang, kum 1260 AD leh 1320 AD inkara mi a ni tih INTACH, Mizoram Chapter chuan an puang.
Puk leh ruhrote hi Vanbawng leh North Khawlek khaw inkara kham panga pukah Lalthanliana, Khawlek-in a hmuhchhuah niin a chhungah hian mihring luruh pakua (keh leh keh lo) leh taksa bung ruhro hrang hrang bakah bel keh them eng emaw zat hmuh a ni.
Heng ruhrote hi N.Khawlek khawtlang hotuten zirchiang tura an ngen angin INTACH, Mizoram Chapter hian phungbawmah Art & Culture Department sawmin May 2, 2025 khan Vanlalhuma Singson, Archaeologist, Art & Culture Department leh Dr. Lahminghlua, Assistant Professor, Higher & Technical Institute Mizoram (HATIM), Lunglei ten an tlawh a, ruhro sample pawh an la.
Sample an lakte hi engtia upa nge tih hriat theih nan carbon-14 dating ti turin khawvel pum huap pawha rintlak nia an sawi, Beta Analytic, Miami, Florida, USA-ah thawnin a result an dawnah kum 1260 AD leh 1320 AD inkara mi a ni tih an finfiah ta tih INTACH, Mizoram Chapter hotute chuan Thawhlehni khan Aizawl Press Club-a thuthar lakhawmtu hmaah an puang a ni.
Puk hi tuipui zawl atanga metre 1,228-a sanga awm a ni.
INTACH, Mizoram Chapter chuan ruhrote a upat zawng an hriatah duhtawk mai lovin Mizo chanchin hlui chhui chiana zirchian zel a tum a, sokar department, Mizoram University department hrang hrangte phungbawma sawmin DNA sequencing kalpuiin heng ruhrote hi tute nge an nih, eng hnam leh thlahte nge an nih tih zawn chhuah a tum mek bawk.