North Korean hruaitu, Kim Jong Un-a chuan Thawhtanni khan Pyongyang chhuahsanin China a pan a, Beijing-a military parade-ah a tel dawn niin chanchinbuten an tar lang.
‘Victory Day’ parade hi Nilainia neih tur hi a ni a, Kim-a hi Chinese President Xi Jinping, Russian President Vladimir Putin leh khawvel ram hruaitu dangte nen an inhmu dawn a, ram khat aia tam hruaitute nena an hun hman ho hmasak berna a ni ang.
Kim-a hian North Korean khawpui chu Thawhtanni tlai khan armoured train hmanga chhuahsanin a relah hian restaurant car pawh awmin French uaiin leh chakai man to sa pawh ei tur a awm.
Rel hi muangchanga tlan tur niin kalkawngah darkar 24 vel hun a hmang dawn niin South Korea-a Yonhap agency chuan a tar lang.
Tun hi kum 1959 hnua North Korean hruaituin Chinese military parade a telpui lehna hmasa ber tur a ni a. Myanmar, Iran leh Cuba hruaitute telin ram dang hruaitu 26 vel an tel dawn a ni.
Kum 2015 khan China-in Victory Day parade a huaihawtah Pyongyang hian an sorkar hotu lawk zinga mi, Choe Ryong-hae chu a lo tir tawh bawk.
Tun hnaiah Kim-a hian ram dang hruaitute a hmu khât hle a, Ukraine nena an indo hnuah Putin-a nen erawh vawi hnih an inhmu tawh.
Beijing a tlawh hnuhnung ber chu kum 2019 kha niin an ram hnih inkungkaihnain kum 70 a tlin lawmnaah a ni a, hemi tum pawh hian relin a kal.
Rela zin hi a pu, Kim Il Sung-a chin chhuah niin ani hian Vietnam leh Europe khawchhak lam ramte pawh a lo tlawh tawh thin.
Kim-a pa, Kim Jong Il pawh kha thlawhna chuan a hlauh avangin relin a zin thin bawk.
South Korean chanchinbu pakhat chuan Kim-a rel hian pindan 90 vel neiin conference rooms, audience chamber leh mut pindan pawh a awm.
Beijing-a hmun hriat hlawh tak, Tiananmen Square-ah Nilaini hian sipai sang telin Indopui II-naa Japan an tlawm leh indo a tawp kum 80-na champha lawm nan kawng an zawh ang.
Minute 70 chhung parade turah hian China-in ralthuam a neih thar ber ber, indo thlawhna, tank leh anti-drone system te pho chhuah a ni ang.
Parades-ah hian khawthlang ram hruaitu tam zawk erawh Russia-in Ukraine a rûn an duh loh avangin an tel dawn lo va, anni hian Putin-a chu a chet dan an helh hle.
Indonesia, Malaysia, Myanmar leh Vietnam hruaitute erawh an tel dawn a, hei hian Beijing-in Asia chhimchhaka a thenawm ramte rilru a hmin zelzia a tilanga ngaih a ni.
EU ram zingah Slovak Prime Minister Robert Fico chu a tel dawn a, Bulgaria leh Hungary ramten aiawh an tir dawn bawk.