- Dr. J.T. Vanlalngheta
He dan siam that, tunlaia Mizorama lar tak hi, Mizo pain tapchhak zawl atang pawha a lo hriat thiam mai theih turin tawi têi ka’n sawi (comment) ve ang e:
A tum ber chu ram puma ram ngaw tih pun a ni a; chubakah, hemi rual hian Pathian duh zâwng-nungcha humhalh te thlengin a huam vek a ni. Thing hmun tih puna, boruaka mihring hîp atana tha lo boruaka boruak chhia (carbon) inchhêk khawl tih tlêm a, hma sawnna hna thawk chunga kum 2027-ah phei chuan mihring tana tha boruak inbuk tâwk (ecological balance) thlentira, carbon pakhat mah awm tawh lo tur ang hiala hma lak tumna a ni bawk a ni. Sawrkar Laipui hian ram pum tana tha a ngaih tuah hian tul a tih chuan, eng thu neihna mahina dodal theih loh turin thu neitu eng pawh: Sawrkar Laipui hnuaia awm zawng zawng te, State Sawrkar te, UT te leh, heng thu neitute hnuaia eng taksa pawh huam hian, a duh hlen chhuahtîr turin thu a pe thei a ni (he dan siam that section 6-naah pawh hian a chiang viau mai); he dan chungchang hi a ni bik lo, ram danpui ziarâng a ni; chuvangin, he dan lo hnawl leh hnawl loh hi a ni êm êm lo; The Constitutional Law han keu hian, Centre thu neihna hi a chiang viau mai. India danpui hi a pianziaah chuan Sawrkar laipui leh State hrang hrangten thu neihna insema, inti buai lova mahni seh seh muala tla a, dan te siam a, bun hran theuh theihna danpui pian ze hrawl (‘Federation’…) nei kan ni, kan tih thin hi, a tak takah erawh chuan Sawrkar Laipuiah hian thu neihna chu a luang khâwm leh si thin (…’but unitary in spirit:) tia kan lo by-heart tluk tluk thin kha a taka a lan chhuahna niah ka ngai. Chuvangin, a thil tum thlirin Sawrkar Laipui hian kan that tlan nan, kan tana tha zawk tura a ngaihah hi chuan state-te dodal avanga thil tha hlentir loh phah emaw, hun rei tak emaw nghak kher lova hlen chhuah a nih theih dan hi uluk takin a ngaihtuah thin a ni tihah hian chiang ila a tha âwm e; awm ze nei lova ram ngaw tih chhiat vak vak hi a tum a ni lo tih hi ring ngam ila, he dan hi i lo lâwm (welcome) theuh zawk ang u, kan tana tha zawk tura ngaih a ni e. A lo tha lo tak zet nia kan hriat chuan kan State ro rel khawl hian Mizorama hun eng emaw chen/hun rei tak hman a nih loh nan (Parliament emaw Court sang ber emaw a kalh zawnga an chêt hma loh chuan), a pass leh thei tho bawk si a.