Dampa bial By-election neih tura MNF candidate atan Dr. R. Lalthangliana ruat a ni.
Dampa bial By-election neih tura MNF candidate hi nimin khan MNF Pisa Hnam Runah an president, Zoramthanga’n a puang a, by-election neih hun tur tak chu chiang taka hriat la ni lo mah se kum 2023 MLA inthlana he biala MNF ticket a ding turin an party sr. vice president, minister hlui ni bawk, Dr. R. Lalthangliana chu ruat a ni tih a sawi.
Dr R. Lalthangliana hi MLA inthlan hnuhnung ber khan South Tuipui bialah hian MNF ticket-in a ding a, ZPM candidate Jeje Lalpekhlua a hneh zo lo.
Tar lan tawh thin angin Dampa bialtu MLA Lalrintluanga Sailo chu kumin July 21 khan a thi a. By-election neih a ngaih avangin inbuatsaihna kalpui mel zel niin Election Commission of India-in Dampa bial inthlen hun tur hi a puang thuai tura rin a ni.
ZPM party chuan August ni 25 khan an party official candidate atan Vanlalsailova an ruat thu an lo puang tawh a. Vanlalsailoa hi MLA inthlan hnuhnung ber khan Dampa bialah candidate niin, MNF candidate Lalrintluanga Sailo (fam) hi a hneh lo a ni.
Mizoram Pradesh Congress Committee (MPCC) chuan candidate tur an ngaihtuah mek bawk a, Mizoram BJP pawhin candidate an neih ngei tur thu an sawi bawk.
Engnge a sawi?
Dampa bial by-election lo awm tura MNF party official candidate atana puan tak, MNF Sr. Vice President Dr R Lalthangliana chuan politics-ah a danglam bikna em em chu an hotute thu a hnial ngai lo tih sawiin, nationalisim nunpuitute sawmna hi hna thei nia a inhriat loh thu a sawi.
Nilainia MNF official candidate tur puanna inkhawmah thu sawiin, Dampa bial by-election atana MNF candidate Dr R Lalthangliana chuan, Rintluanga Sailo khan kum 1986-a ramhnuai atanga an lo chhuah khan u ang chiahin a vuan nghet nghal chat tih sawiin, “Kei pawhin nau ang chiahin ka en a ni,” a ti.
Tawngtai reng thin mite a rawn thu sawiin, minister hlui ni bawk Dr R Lalthangliana chuan, “Chung mite chuan chung lam rawnin an tawngtai reng a, ka tlin dawn leh dawn loh chu an sawilo nachungin, ding rawh min ti vek a. Politics-ah hian ka danglam bikna em em chu kan hotute thu ka hnial ngai lo, nationalism nunpuitute min sawmna hi hnar thei niin ka inhre lo a, engmah chhuan tur ka neilo a, kan mittui tla mek min hruk hulsak turin Dampa bial mipui ka sawm tak zet a ni,” a ti.