Aizawl: Health Minister Lalrinpuii’n nimin zing khan MINECO Khatla atangin NHM hnuaia NAS enkawl, sorkar damdawi ina dah tur 102 ambulance motor pariat a vai liam.
Hemi puala inkhawmah health minister chuan mipui mamawh ambulance thar an nei thei ta chu lawmawm a tih thu a sawi a. National Ambulance Service chu NHM hnuaia programme pakhat, kum 2013 atanga kalpui tan anih thu leh raipuar ten thianghlim leh hrisel taka sorkar damdawi ina nau an neih theih te, nausen damlote damdawi in lama kal lam leh haw lam phur kual zung zung thei tura ambulance ruahman te, damlo (Emergency) enkawl hmanhmawh ngai te damdawi ina phurh nghal zung zung theihte chu a thil tum ber a ni tih a sawi.
Tunah hian National Ambulance Service, NHM hnuaiah Ambulance motor 62 awmin, district hrang hranga sorkar damdawi in 59-ah te dah an nih thu leh chungte chu NHM hnuaia Call Centre (102) atanga darkar 24 chhung enkawl an ni tih a sawi a. Ambulance-te chu an lo service rei ve deuh tah avangin, a tahtawla a thar thlak tura ruahmanna siam zel tum a nih thu health minister hian a sawi bawk.
Ambulance vailiamte hi Chawngte CHC, Sakawrdai CHC, Ngopa CHC, Bunghmun South PHC, Khawbung PHC, Tawipui PHC, West Phaileng PHC leh Rawpuichhip PHC te tan pek a ni.