India chuan lirnghingin a sawi, Afghanistan-ah puihna dang pek belh lehin Thawhlehni khan chhawmdawlna bungrua tonne 21 a thawn leh.
India hian Thawhtanni khan puihna thil a lo thawn tawh a, thlawhnain Thawhlehni khan a dang tam zawk a thawn leh a. External Affairs Minister S Jaishankar chuan a thawn leh zingah hian generator, portable water purifier, damdawi, blanket, puan in leh sleeping bag tam tak a tel tih social media-ah a tar lang.
Pathianni zan lai hma deuhva an ram khawchhak lama lirnghingah hian mi 1,400 chuang thi an awm tawh a, mi 3,000 velin hliam an tuar bawk tih Taliban sorkar chuan a sawi a. Kunar province-in an tuar na ber tih a sawi bawk.
Kunar province-a Nurgal, Chawkay, Chapa Dara, Pech Dara, Watapur leh Asadabad district-ah chuan in 5,412 zet a chhia.
Pathianni zana magnitude 6.0-a nain a sawi hnuah Thawhlehni chhun khan Kunar province-ah vek hian magnitude 5.2-a na a nghing leh bawk.
Thawhtanni khan Jaishankar-a chuan Taliban Foreign Minister Amir Khan Muttaqi-a biain India-in an rama thil thleng chu a ngaihven reng thu leh a tul anga puihna pawh pek zel a inhuam thu a hrilh.
India bakah hian Taliban chuan ram dangte pawhin an puih tur thu an sawi hlawm thu leh thenkhat chu an dawng tawh a, emergency relief committee-in a mamawhte hnenah an sem mek thu an sawi.
Thawhtanni khan Kabul-a Indian mission chuan Kunar-ah hian chhungkaw awm theihna puan in 1,000 leh ei tur tonne 15 a lo thawn tawh a ni.