Chelsea leh Fulham an inhmachhawn tuma Josh King-a goal an pawmsak lo kha thutlukna dik lo tak a nih thu Professional Game Match Officials Limited (PGMOL) chief Howard Webb chuan a sawi chhuak.
Inrinni khan Stamford Bridge-ah Chelsea chuan Fulham an mikhual, minute 21-ah Fulham counter attack atangin kum 18 mi, King chuan goal a khung.
VAR-a thuin referee Robert Jones-a hnenah halfway line-a thil thleng enfiah turin thurawn a pe, Fulham goal a pawm lo zui.
Halfway line-ah Rodrigo Muniz chuan Trevoh Chalobah a bum a, a ke a rahsak palh a. Hei hi referee chuan foul hamna tlakah ngaiin a ham a, Fulham goal a pawmsak ta lo a ni.
He thutlukna khan sawisel a hlawh hle a. VAR duty Michael Salisbury chu a bul tumtu a ni a, foul pawh kha a nihna takah chuan football-a thil thleng pangngai a ni a, goal pawmsak lohna tur atan chuan a nep mah mah a ni.
Salisbury hi Pathianni zana Liverpool leh Arsenal inkhelah VAR-a duty tur a nih leh laiin PGMOL chuan a hna an chawlh lailawktir ta a ni.
He inkhelah hian Chelsea chuan si hnih faiin hnehna an chang a, Joao Pedro leh Enzo Fernandez ten goal an khung.
Match Officials Mic’d Up-ah PGMOL chief refereeing officer Webb chuan King-a goal an pawmsak lo kha thutlukna dik lo tak a nih thu a sawi chhuak.
“Kha thil kha sawi ho ngai pawh a ni lo, thutlukna dik lo tak a ni e. Premier League inkhel enkawl dan turah VAR inrawlhna tur chi hrang hrang duan a ni a, chu chu kha inkhelah khan kenkawh a ni lo a ni,” a ti.
“Penalty hamna chi a ni nge ni lo tih chungchangah te, referee-in thutlukan siam harsa a tihnaahte a rawn mai tur a ni a, chutiang chuan VAR hman dan tur mumal takin kan duang a. Kha thil thlengah kha chuan VAR hman dan tur kan duan ang kha zawm a ni lo a, thuneihna hman sualna liau liau a ni,” tiin Webb chuan a sawi.