Thawhlehni atanga khelh tan, 75th Junior (Boys) Nationals Basketball Championship-a an khelh hmasak bera an chak hnuah Mizo rawltharte chu a vawi hnihnaah Gujarat lakah an tlawm.
Basketball Federation of India (BFI) buatsaih inelna hi Ludhiana Basketball Academy, Guru Nanak Stadium, Ludhiana, Punjab-a neih niin Mizoram hian Group C-a an inkhel hmasa berah Thawhlehni khan Puducherry chu 67-65-in an hneh.
Nilaini chawhmaa an inkhel vawi hnihnaa Court 2-ah Gujarat nen inhmachhawn lehin 57-50-in an tlawm ta thung a ni.
Mizoram hi group paruka an inthenah an group-ah hian Ninganiah hian zingah Goa hmachhawnin zanah Odisha an hmachhawn zui leh dawn bawk a. Tun dinhmunah hian an la tla bik lo a ni.
Inelna hi karleh Thawhlehni thlenga kalpui tur a ni.
Mizoram Basketball Association (MBBA) hruaitute chuan Mizo rawltharte zin chhuah hma hian he inelnaah hian an thleng sang lutuk ngai lo va, tun tumah erawh chuan an player-te enin an beisei a sang tih sawiin kum dang aia thlen thui ngei an inbeisei tih an an sawi a. An beisei angin an khelh hmasak berah hnehna an chang nghal a, a vawi hnihnaah tlawm zawkah tang mah se tlang ngei tumin an bei chhunzawm zel dawn tih an sawi a ni.