Dampa bial by-election lo awm turah BJP Mizoram pawhin candidate an tifel tawh a, BJP National lama an hotute pawmpuina nghak.
The Zozam Times zawhna chhangin BJP Mizoram President Dr K Beichhua chuan, Dampa bial by-election lo awm turah an party pawhin an chuh ve ngei dawn tih sawiin, tunah hian candidate tur pawh an rel fel tawh a. Mahse, National BJP pawmpuina an nghak mek a. Inthlan hun puan la ni rih lo mah se, political party dangin candidate an puan sup sup tawh avangin, BJP candidate tur an puan thuai a rin thu a sawi.
Dr K Beichhua sawi danin, BJP National lama inthlan buaipuitu, an hotute chu tun chawlhkar tirah Mizoramah a rawn zin dawn a. A kaihhruaina hnuaiah Mizoram BJP hruaitute’n an sawi ho ang a, chumi hnuah an puang dawn tih The Zozam Times a hrilh.
Hetih lai han, BJP Mizoram President Dr. K.Beichhua chuan BJP National President JP Nadda pawmpuinain, BJP Mizoram State Morcha head turin mi li — State Mahila Morcha President atan Helena Lalsawmkimi, State Kisan Morcha President atan Lalmalsawma, State Schedule Tribe Morcha President atan Chawnghmingthanga leh State Minority Morcha President atan William Rinawma Pachuau te ruat an ni.