- K. Hmingthankaia
Kan Bible-ah hian, “I Vengte hek suh” tih a awm. Inhek hrim hrim hi thil tha lo lam kawk a nih vangin, inhek tih ri hriat hrim hrim hi a hahthlaka, a ri a mawi lova, engemaw ti takin rilru a tihah thin.
Tunhnai August 2025 thla tawp dawn tepah Pi Maria CT Zuali IAS, Mizoram Sawrkara Commerce and Industries Director chu a thawhpuiten Minister hnena an hek thu rampum hriat turin a thang chiama. A hnu lawk September ni 1-ah an transfer thu hriat zui a ni. Hetia mi inhek thu a darh chiam hian an hek atan chuan thiam lo zawk leh dik lo zawk, misual nih hlawh theihna a nih avangin a nuam lo duh viau ang. Tin, mi hektute pawh hi mi hek hmang misual leh rilru dik lo zawk nih theihna a nih tho avangin miten an thiam ngawt nghal ngai hek lo.
A lehlam lehlam tantute pawh social media lamah an tam viau tawh awm e. Pi Maria-i thlavang hauhtu pawh an tam tawh mai thei.
Kei chuan social media ka en ngai vak loh avangin enge an sawi pawh ka hre ve chiah lo. Mahse, social media-a thute chu thu tak leh rintlak vak lo, rinthu a tam ang tih ka hria. Tin, he department chhunga awm ve lo tan chuan thu dik thu lai hriat tak tak theih pawh a ni lovanga, a chhunga awmte pawhin tan lam leh tan loh lam, dik zawk leh dik lo zawk titu an awm tho bawk ang.
Kei pawhin a dik leh dik lo, thu haw lam leh kal lam pawh ka hre lo. Mahse, Pi Maria-i hi ka lo khawngaihin ka lo ralkhat tan ve ringawt a ni. A chhan chu, hetia an hek thu a tlangthan vak tuk lawka an sawn thu mipuiin kan han hriat hian, a thiam lo zawk, a dik lo zawk, misual chan a chantir thei deuh tlat a ni. Chuvangin, thil hrang hrang ka ngaihtuahin Pi Maria-i hi ka lo lainat deuh tlat a ni.
Tunhmaa ka hriat ve dan khan, sawrkar hnathawk tupawh, a te ber pawh inhekna a awm chuan, a dik leh dik loh chhuitu tur, an heka hnathawh tet leh len azir khan inquiry officer kha an ruat thina, tin, an heka pawh chu insawifiahna hun an pe bawk thin ni khan ka hria a. Chutiang chuan Pi Maria-i te case hi an ti ve em? Sawrkar hi a va che rang phut phut ve. A hmain thu inmun rei tak a lo awm tawh zawk em ni?
Sawrkar hnathawk leh thawk lo zingah pawh, mi dik leh thil dik taka tih duh mi, taima leh thahnemngaite hian, huat, ngei, er, rel leh do an hlawh duh hle a. An bula miten hnawk an ti duh hle. Sawichhiat leh tihchhiat an tum thin. Hei hi Setana khawvel dan, thil thleng fo a ni. Chutiang chu Pi Maria-i chungah hian a thleng ka ti lo naa, a nih chu ka ring deuh a ni. Mizoram Sawrkar hnathawkte hi rei tak lo inthlahdah tawh an nih bakah, mihringte hian zalen kan duh em avang hian, kan zalenna tur daltu nia kan hriat chu kan haw duh hle a, a do turin inthurual pawh a awl duh hle tih ka hriat chian vang a ni.
Pi Maria-i hi MNF sawrkar tlak chhan leh ZPM sawrkar theih chhan, factor lianpui zinga ‘ Mi’ a ni. Chuvangin kei pawhin ka lo tan ve em em a, ZPM sawrkar pawh hian a dah pawimawh hle turah ka lo ngaia, Maria divides…. tihte hi a thleng ang tih ka hlau a nia. Champhai DC a nih laiin thil tha leh dik a duh vang leh, ram dan a ngaihpawimawh avangin, Mizoram mipuiin kan huat em em leh kan sawi luih luih, kut hnathawktu thenkhatte tawrhna ni bawk, kuhva rah smuglin chu na taka a do avanga MNF sawrkarin a sawn bo niin mipuin kan ringa, chu chu ZPM tan malsawmna nasa tak a ni. An sawn hnu reiloteah IAS a kai zui lehnghal.
Chuvangin, ZPM kalphungthar sawrkar inti leh, sawrkar hnathawkte siamthat tum viau anga lang sawrkarah hian, neitu rilru pu tak chungin ngam tak leh huai takin, thahnemngai takin hma a la ta pawh a ni thei asin. Mahse, hetia an sawn ta mai hi a Minister nen lam hian thil fel lo a awm ta em ni tih awl tak a ni. An sawnna post chu a tha zawk pawh a ni thei, mahse, thiam lo zawk chan chang ang deuha a lang hi na ka lo tihpuia, ani pawhin na a tih ve tho ka ring a ni.
A thuhrimah, hetia inhekna thu a than rual ruala kan intransfer zel dawn chuan, sawrkar hnathawkten inhek nuam a ti lutuk anga, sawrkar hnathawk awm tha duh lo leh zalen leh zelthei chak, rilru hrisel lo, dik lo zawk apiangte hian mi an hek sup sup mai ang tih ava hlauhawm ve. Opposition lawmah a tla anga, fuihpawrh tur an lo zawng char char mai dawn si a. Pi Maria-i pawh boruak a nei fo tawh si a, kan tilar ta bawka, amah a fit-in a zei bawk si a, next election-ah chuan tute emaw party candidate a ni mai lo’ng maw?