Assam-a Karimganj tih thin district chu tun hnaiah a hming thlak a ni a, hemi duh lova bandh huaihawtah a duh lotu pungkhawm leh venhim hna thawktute inkarah tharum thawhna a thleng.
Sribhumi tia district hming thlang duh lotute zingah hian zirlai leh Congress worker te pawh telin National Highway 37 chu a pawimawh lai, Badarpur College kawng intawh khawmna leh Station Road-ah kawngpui dangin lirthei kal vel a buai phah a. Passenger phur bus leh bungraw phur truck te an tang nasa hle.
District hming thlak duh lova punkhawmnaah hian mi thenkhatin lung thawha police an vawm hnu atanga chhuak niin police leh chanchinbu mi thenkhatin hliam an tuar a. Venhim hna thawktute hian tiang nen an bei let a; mahse, mipui hi inhawr khawm tha lehin kawng an dang nawn leh a, an innawr zui ta chiam a ni.
Sumdawnna hmun leh zirna inte khar a ni a, district chhunga Badarpur leh a chhehvel chu a che hlei thei lo va. Thuneitute chuan a tirah chuan muanawm takin duh lohna hi lantir a ni a, an zinga thenkhatin tharum thawhin boruak a muanawm lo zui ta chiam niin an sawi a. Sribhumi Sub-Divisional Officer chuan a hmun pan nghalin mipuite chu inbengdai turin a ngen.
Assam Chief Minister Himanta Biswa Sarma-a chuan November 19, 2024 khan Karimganj tih chu Rabindranath Tagore-a chawimawi nan Sribhumi tia thlak a nih tur thu apuang a. A hming thlak chu ‘district-a cheng mipuite lo beisei leh duh em em tihhlawhtlinna tur’ a nih thu a sawi.