Aizawl: Zirtawpni kalta khan Association of Tour Operators Mizoram (ATOM), Tourism Department leh Agriculture Department tangkawpten Agro Tourism chawikan nan Hmuntha Zau Lo Zawhpui an buatsaih a. Agriculture Minister PC Vanlalruata leh Tourism Minister Lalnghinglova Hmar ten an hmanpui.
Minister PC Vanlalruata chuan loneituten hlim taka lo zawhna hun an hmang thei chu a lawmpui a. A bial chhung Hmuntha khua chu khaw taima tak an nih thu leh Tourism department ten hma thar lakna tlak an ni tih hria a, ruahmanna an siamsak avangin leh home stay sa tura hma an lakpui avangin lawmthu a sawi.
Tourism Minister Lalnghinglova Hmar pawhin thu sawiin, “Keinin ngaia kan neih hi state pawn lam mi, khualzinte tan thil hmuhnawm tak a tling thin,” tih sawiin, khualzin mite hip nan Lo Zawhpui hi tangkai taka hman theih a nih thu a sawi.
Tawi tlang hi tourism hmun atana puan a ni tawh tih Lalnghinglova Hmar chuan sawiin, khualzinten an tlawh chak theih nana chei a nih tur thu leh India ram hmelhriat khawpa chei tuma ruahmanna an neih mek thu a sawi bawk.
Hmuntha Zau Lo Zawhpui hunah hian Tourism Director R Lalrodingi, Agriculture Director R. Lalnunzira leh Hmuntha VCP P. Lalrinchhana te pawhin thu an sawi.