Red Sea chhunga hrui (cable) chatin Asia hmun thenkhat leh Middle East-ah inbiakpawh a nghawng mek tih mi thiamten an sawi a, a chah chhan tak erawh chiang taka hriat a la ni lo.
Tuipui chhunga cable-te hi Gaza Strip-a Israel-in Hamas a beih a tihtawp nana nawr nan Yemen-a Houthi helhovin beih an tum nia sawi a awm tawh thin a; mahse, an nih ngai loh thu an sawi thung.
Microsoft chuan an website-ah Mideast-a mite chuan ‘Red Sea chhunga fiber cable chat avangin harsatna an tawk mai thei’ tih an sawi a. Washington-a Redmond firm chuan thui sawi lovin Middle East-a internet traffic tha lo hian ‘a nghawng na lutuk lo’ tih an saiw thung.
Internet hman dan thlithlaitu, NetBlocks chuan ‘Red Sea-a cable chat neuh neuh awmin ram thenkhatah internet connectivity a nghawng’ tiin an sawi a, atuar zingah India leh Pakistan pawh a tel tih an sawi a. ‘Jeddah, Saudi Arabia bula SMW4 leh IMEWE cable system chiang lo vang’ niin an sawi bawk.
South East Asia–Middle East–Western Europe 4 cable hi Indian conglomerate Tata Communications-in an enkawl niin India-Middle East-Western Europe cable hi Alcatel-Lucent hnuaiah consortium dangin an enkawl a ni ve thung a. Firm pahnihte hian engmah an la sawi rih lo ve ve thung.
Pakistan Telecommunications Co. Ltd. chuan Inrinnia thu a chhuahah an ram chhung hmun thenkhatah harsatna a awm tih an sawi.
Saudi Arabia-ah erawh chuan harsatna a awm hriat a ni lo thung.
United Arab Emirates-ah erawh chuan sorkar hnuaia pe chhuaktu, Du leh Etisalat hmangtute erawh chuan internet a chak lo tih an sawi a, sorkar erawh chuan engmah a la sawi lo.
Tui chhunga hruite hi lawngin thirchakai a thlakin a tichat thei a, beih avanga chhe thei a ni bawk.
Kum 2024 tir lamah khan Houthi-ten Red Sea chhunga cable tihchah an tum tia sawi a awm a. A hnu lawkah eng emaw zat a chat nghe nghe a; mahse, an tih a nih loh thu an sawi a. Pathianni tuk khan NetBlocks chuan helho hnuaia al-Masirah satellite news channel chuan cable chat a awm thu hi an puang ve niin a tar lang.