Aizawl: UDPA Department, Aizawl Smart City Ltd, Aizawl Municipal Corporation leh Central YMA hmalaknaa Aizawl leh a chhehvela YMA branch-te veng fai inelna kal mekah, Inrinni khan endiktu – Panel of Judges ten veng fai leh fai loh an endik tan.
Central YMA-in direct-a a enkawl YMA branch-te faina kawnga inelna hi March 31, 2025 khan UDPA Minister K Sapdanga’n Sikulpuikawnah a hawng a, hemi ni hian Aizawla veng hrang hrangah hnatlangpui huaihawt nghal a ni. Kumin June thla khan a khuhhawnna hun Central YMA Hall-ah neih leh a ni bawk.
Faina kawnga intihsiak endiktu Panel of Judges-te hi Save The Riparian hotu Romalsawma, Environmental Science-a research scholar Gospel Lallawmzuali leh MJA General Secretary K Zothanpara te an ni a. Inrinni zingkar khan endik tanin, Aizawl hmar lam atangin an endik tan a ni.
Endik thawh khatna hi kumin September atanga November thla chhungin neih a ni dawn a, kum thar tir lamah endik thawh hnihna an nei leh bawk ang.
Inelnaah hian AMC area-a YMA branch zawng zawng bakah, Aizawl hnaivaia khua leh veng thenkhat an tel a, an vaiin YMA branch 109 an ni.
Ruahman dan chuan, nakkum Chapchar Kutah result puana lawmman sem tum a ni a. YMA branch fai berin Rs 3,00,000, pahnihnain Rs 2,00,000 leh pathumnain Rs 1,00,000 an dawng dawn a; endik thawh khatna atanga thawh hnihnaa hmasawn zualte hnenah lawmman hlan tum a ni bawk.