Bihar assembly inthlan a hnai zel a, politics-a inbeihna pawh a lian sawt hle a. BJP chuan Congress hruaitu Rahul Gandhi-a chu hun pawimawhah ‘a tih dan thin angin chawlh a hmang bo leh daih’ niin an sawi.
Pathianni khan BJP hruaitu, Amit Malviya-a chuan Gandhi-a hi Lankawi-a hi ‘nuamsa takin chawlh a hmang’ niin X-ah a tar lang.
“Rahul Gandhi-a chu Langkawi, Malaysia-ah nuamsa taka hun hmangin a bo leh daih mai. Bihar-a politics boruak lum leh sang tak kar chu Congress lalpa tan hian a harsa lutuk a, hmanhmawh takin chawlh a la leh ta. Nge ni, tute mahin an hriatpui lohvin a rukin mi a lo kawm zawk?” tiin Malviya-a hian a tar lang a ni.
“Heti lamah, mipuiten harsatna khirh tak tak an tawh laiin Rahul Gandhi-a chu awm loh daih leh chawlh hmangin a lo buai ve em em thung si,” a ti bawk a, Gandhi-a hun hmanna nia a sawi thlalak a dah tel bawk.
Gandhi-a hian Bihar-ah hian kar kal ta Thawhtanni khan Voter Adhikar Yatra a ti zo chiah a. August 17-a Sasaram atanga tana ni 16 chhung Bihar a fan chhuahna chu Patna-ah a khar fel deuh chiah a ni.
Yatra hi BJP leh election commission-in ‘vote an ru’ tia puha a tlangauna leh inthlan atana a campaign-na niin INDIA tangruala hruaitu dangte pawhin an tawiawm tha hle a, an zingah hian an thawhpui lian ber zinga mi, RJD hruaitu, Tejashwi Yadav-a pawh a tel.
Congress party chuan BJP hruaituin chawlh hmanga Gandhi-a an puh leh bo daih anga a puhna hi he chanchin ziah lai thleng hian an la chhang let ve rih lo.
Tun hma pawhin Gandhi-a ram pawna a zin hi sawi hlawh a lo ni tawh thin a. BJP chuan inthlan hnaih hun lai bawra ram pawna hun a hmang hi sawi chhuakin Congress leh amah beih nan an lo hmang tawh thin.
Kumin kum tirah pawh khan BJP hruaitute chuan Vietnam leh ram dang tlawha a zin deuh fo chu sawi chhuakin ‘puan zar lohva zin’ tia sawiin Congress chu an hruaitu zin nasat dan chu ‘ram himna atan pawha tha lo thei’ tiin an beih phah.
“Leader of Opposition a ni a, a chanvo chelh hi a pawimawh em em a ni,” tiin Malviya-a pawh hian a hmain a lo sawi tawh a. “Rang deuh deuh, sawi lawk lova a zin leh thut thin hi thil langtlang lo leh chiang lo lam a pawl a ni,” tiin a sawi a ni.