- Dr. C. Lalrampana
Nihnih awh Mizoram Legislative Assembly Session fur thutkhawm chu August 28, 2025 khan tiamchin awm lovin Speaker-in a titawp a. Speaker Pu Lalbiakzama kaihhruai nihnih awh Assembly fur thutkhawmah khan, starred question 350 lut zingah zawhna 342 pawm a ni a, House-ah zawhna 5 chhan niin chhan hman loh 35 a awm a ni. Unstarred question-ah zawhna 124 lutin zawhna 97 admit a ni. House dawhkana report dah 19 niin official Resolution pakhat – Mizorama Forest (Conservation) Amendment Act hmanna tur put luh chu House-in lungrual takin a pawm a, lehkha pawimawh 13 pharh a ni a, Government Bill 4 lutte pass vek a ni bawk. Bill pass takte hi, Minister Pu K. Sapdanga’n a put luh-The Mizoram Local Bodies Ombudsman Bill, 2025 : Minister Pu Lalghinglova Hmar bill put luh -The Mizoram Private Placement Agencies (Regulation) (Amendment) Bill, 2025. Minister Pi Lalrinpuii putluh Mizoram Prohibiton of Beggary Bill leh Mizoram (Land Revenue) (Amendment) Bill, 2025 te pass a ni. Speaker Pu Lalbiakzama chuan session zawhnate chhang hma thin turin Dept official-te a chah a, tun hi vawi 3 sawina leh house kaltlanga ngenna siam tum thumna a ni a ti. Opposition Leader Pu Lalchhandama Ralte chuan-”Session-a an tih tur list of business chu a hma zan dar 12-ah pawh an la hmu thei lo thin tih sawiin hei hi Speaker Pu Lalbiakzama chuan session zawhnate chhang hma thin turin Dept official-te a chah a, tun hi vawi 3 sawina leh house kaltlanga ngenna siam tum thumna a ni a ti. a tih thu leh Chief Secy kaltlanga a chhang tlai thin department-te pawh zilhhau hial a ngai dawn a ni” a ti a, Tin, “Hetiang hian house a tibawrhbang thei a ni” a ti bawk.
Nihnih awh fur thutkhawm chanchin lak khawm atang khian kan ram rorel khawlte la felfai tawk lohzia i han bihchiang lawk teh ang:
- Starred question 350 lut zingah zawhna 342 pawm a ni a, House-ah zawhna 5 chauh chhan niin chhan hman loh 337 la awm tur ni awm tak, 35 angin tarlan a ni a; zawhna pawm chin 342 zingah zawhna panga (5) chauh chhan hman a nih chuan a bak zawhna 337 chhan lohvin an dah (pending) tihna a ni a; a va han mak em em ngai ve? Engtika chhan zawh tur nge ni ang? An inbuatsaihna a tha lo hle tih a lang chiang. A hma daih atangin fur thutkhawm a awm dawn tih an hre lawk vek si a, a tlem berah zawhna 20 tal chhan hman awm tak a ni a, mahse, zawhna panga chiah an chhang hman a ni.
- Unstarred question-ah zawhna 124 lutin zawhna 97 admit a ni a. Heta tang hian zawhna engzat nge chhan hman a nih tarlan a ni lova, hei pawh hi an fel tawklohna rah chiang taka lo lang chu a ni. Hei phei chu tawngkaa chhan mai chi a ni lehnghal a, engemawchen chu chhan hman awm tak a ni a, mahse, engmah tarlan a ni lo.
- Speaker Pu Lalbiakzama chuan session zawhnate chhang hma thin turin Dept official-te a chah a, tun hi vawi 3 sawina leh house kaltlanga ngenna siam tum thumna a nih thu a sawi bawk. Chief Secy kaltlanga a chhang tlai thin department-te pawh zilhhau hial a ngai dawn a ni” a ti a, Tin, “Hetiang hian house a tibawrhbang thei a ni”a ti bawk. Department Official-te hi House chhungah awmin session hi an vil reng thin a, zawhna lutte an chhan hma thin loh avanga harsatna an tawh thin thu a sawi lang hian kan sawrkar department-te inthlahdahzia a tilang chiang hle a, MLA-te thiam loh a nih theihna erawh zawhna an pek luh tlai vang a ni thei. Chuvangin, MLA-te leh Department Head-hote hi an inenfiah a ngai takzat a ni. Vawi 3 ngenna siam a nihna a ni tawh lehnghal a, thil zahthlak tak chu a ni e.
- Opposition Leader Pu Lalchhandama Ralte chuan-”Session-a an tih tur list of business chu a hma zan dar 12-ah pawh an la hmu thei lo thin tih sawiin hei hi Speaker Pu Lalbiakzama chuan session zawhnate chhang hma thin turin Dept official-te a chah rualin Chief Secy kaltlanga a chhang tlai thin department-te pawh zilhhau hial a ngai dawn a ni” a ti a, Tin, “Hetiang hian house a tibawrhbang thei a ni” a ti bawk. Tun atang chuan Speaker sawi ang hian Chief Secretary kaltlangin department tuan muang apiangte chu zilhau thin se, MLA zawhna pe lut tlai pawh pawmzam mai lovin hnawlhsak hmiah ngam zel se list of business pawh hi a hun takah member ten an hmu thei ngei ang. Chuvangin, kan ram sawrkar department-te leh MLA-te hi han belhchian tak tak chuan an lo chuti lua lo hle ni berin a lang.
- MLA-te’n Mizo tawng an thiam nal lo: Mizo tawng hi Mizoram-a Official Language a ni a, Mizoram Official Language Act 1974 chuan -Mizoram Sawrkar hnuaia official thil zawng zawnga hman theih turin Official language atan Mizoram Legislative Assembly chuan mizo leh, English chu State Legislature-a danpuiin a ruahman hnuaia official business atana hman theih turin thuneihna a pe a, Mizoram Official Language Act, 1974 hnuaiah Mizo tawng leh saptawng chu state official language a nih thu a puang tawh bawk. Governor-in August 14, 1987 khan hriattirna a chhuah tawh nghe nghe. Heti chung hian kan MLA-te zingah mahni Mizo tawnga ziak takngial pawh A,AW,B zirlai ang maia bahlah taka la chhiar boh boh tawkte an awm a, thlirtute nuihzatbur mai an changleh thin. House-a tawng hman atan English leh Mizo tawng pawm a ni a; chutih laia Non-Mizo MLA fel tak takte’n saptawng hmang lova Mizo tawng an hmang lui ve tang tang thin hi chu an fakawm thin hle. Hetiang a nih lai kara MLA thenkhat Mizo tawng leh saptawng sehpawlh tam lutuka bahlah tak chunga thu an han sawi thinte hian Mizo tawng hlutna a tibo zo vek thin. Mizo tawng leh saptawng sehpawlh nuaih ai chuan Mizopa tan chuan Mizo tawng hlang dik tak hmang mai thin se. Saptawng an thiam zawk a nih pawhin saptawngin sawi mai se a tha zawk tih hre tharleh se a lawmawm ngawt ang.
- Hawihhawmna leh phungthlukna an nei lo: Zawhna leh chhanna emaw, budget sawiho leh Bill pass tur sawiho a nih laia Budget pharhtu, bill puluttu leh zawhna neitu leh zawttute tawng laklawh laia lo chhan buai leh auh buai ching an la tam hle a, hei hi hawihhawmlohna leh phungthluklohna lian tak a ni. Tute pawhin thu sawi se, an sawi laklawh laia lo auh buai leh lo chhan buai chin hi a mawi lo mai ni lovin ram mipuite tan hlawkna a awm lova, buaina zakhua thlentu mai a ni. Hetiang hi ching tawh lo hram se a lawmawm ngawt ang.
- Thupuiah an bel tawk lo: Rorel lai leh Eptu MLA thenkhatte zingah an thupui chaiho lai meka bel tawk lo leh zan kal tak tak, sawi ve phet tum an la awm nual. Mahni sawi tur thupuia chiang lo chung chung chuan hetiangho hian sawi ve phet tum thin lovin ngawih chuh thiam maì thin se alawmawm ngawt ang. Hetiang MLA-te hi an ninawmin a chhawrnaawm loh tlangpui. Chuvangin an inzir nasat a la ngai hle.
- Mahni rorel sawiselleh an ching: Rorellai an ni emaw, eptu lam an ni emaw, House-a bill/Act an pawm tawh chu an pawm tlan a ni mai. Chutih laiin tun tumah khan official Resolution pakhat – Mizorama Forest (Conservation) Amendment Act hmanna tur put luh chu House-in lungrual takin a pawm a, mahse, session khar hnuah eptu lam hian Social media platform hrang hrangah sawiselin political advantage lak tum ni awm takin an dodalleh chiam chiam site hi kan MLA-te la puitlin tawk lohzia tilangtu a ni. Hetiang hi a awm fo loh nan rorel lai pawh hian ‘all party lagislature meeting’ kovin an duhkhawp loh lai sawihova siamthain House-ah pulut thin se a tha ni mai tur. Central sawrkar pawhin hetiang hi a uar hle. Chuvangin, Mizoram Ministry pawh hian a chetzia (style)-te hi thlak ve thin se a lawmawm ngawt ang.
A tawp berah chuan kan ram roreltute hian mipui hamthatna leh hmasawnna tur lam hawi bill/act leh business-te hi uluk taka ngaihtuahin kalpui thin se, House-a bengchhen vak ringawt hlawkna awm si lo leh hnawkhnai thilte hi thliar thiamin hnawl ngam thin se tun aia felfai zawk hian kan la kal thei ngei ang.