AZL: Assam Rifles chuan Champhai district a Myanmar ramri a awm Saikhumphai atangin ralthuam thahnem tak an man.
Thuchhuaha an tar lan danin, Assam Rifles chuan an thudawn bawhzuiin Saikhumphai bul ramngaw chhah tak chu dapin Zirtawpni zing khan ralthuam thahnem tak an hmuchhuak a. An ralthuam hmuh chhuahte hi – Germany siam Heckler & Koch G3 Assault Rifle pakhat, US siam Springfield Sniper Rifle pakhat, 60 mm Mortar Tube pakhat leh rifle chi hrang hrang mu 21 bakah grenade 13 te a ni.
Hei bakah hian bomb tihpuahna Cordtex hrui metre 8, bomb palpuahna hrui trip wire 2, Sniper rifle chunga chhawn chi entlang, Rocket Propelled Grenade (RPG) extender 2, AK-47 assault rifle leh Pistol magazine pakhat ve ve, Radio Set leh antenna pahnih, antenna dang bakah thil dang eng emaw zat an hmuchhuak a ni.
Assam Rifles hian an ralthuam mante hi Dungtlang Police Station-ah chhui zui turin an hlan a, mihring man erawh an nei lo a ni.