Aizawl: Mizoram Police chuan tun hnai ni hnih chhungin ruihhlo eng emaw zat an man
September ni 18 khan Saitual Police chuan Uglobe Brand Heroin kg 9, Rs vbc 2.5 man hu an man.
Thla hmasa August khan Saitual PS chuan Heroin Kg 6, Rs vbc 1.8 man hu chu lirthei pakhat (‘Intra’ pawl, B/R No. MZ01 X 1909) Lalliancheua (20), Falam, Myanmar (Zuangtui-a cheng) nia inchhal khalh leh a lirthei neitu, Lallianmawia (25), Falam, Myanmar (Zuangtui, Aizawl-a cheng) nia inchhal nen man an lo ni tawh a. Hemi tum hian ruihhlo hi motor ke pai chhungah man a ni.
Hemi hnu hian ASP Rokima, MPS leh Arun Balgotra, IPS te kaihhruaina hnuaiah chhui zui a ni a, he ruihhlo tawlh ruknaah hian a dang man loh a la awm tih hriat chhuah a ni.
Ruihhlo tawlhtupa kawm ngeih tur hian mi in rawk ching case nei lai hman tangkai a ni a, ani hmang hian lirtheiah hian a vaiin Heroin Kg 15 thuhruk a ni tih hriat chhuah a ni a. A lirthei hi thiah darh vek a nih hnuah Heroin Kg 9 hi man belh leh a ni.
Heti hian he thubuaiah hian a vaiin Heroin Kg 15 man a ni a, chhui chhunzawm zel a niin, tun tuma Saitual Police te Heroin man hi Mizoram Police-in tum khata Heroin a man zinga tam ber nia hriat a ni.
September ni 19 khan Champhai Police chuan Methamphetamine kg 70.2, Rs vbc 9.12 man hu an man bawk.
Zokhawthar Police hnen atanga ruihhlo tawlh chungchang an thu dawn bawhzuiin Champhai PS team, SI Lalhunthara leh Lalrinzuali, MPS, Dy. SP (Proby) hona hnuaiah leh Vivek Kumar Maurya, IPS, SDPO Champhai enpuinain din a ni a. Anni hian he ruihhlo tawlhnaa inhnamhnawih ngeia hriat, Lalnunthara (27), Dinthar Veng, Champhai chu Zotlangah nangchingin uluk taka an zawn hnuah Methamphetamine Kg 70.200 (mum 656,500, tel 65), satha bag pahniha dah chu an mansak ta a ni.
Ruihhlo hi Rs. 9,12,60,000 man hu nia chhut a ni a, Champhai PS thubuai ziah luh a ni.
He ruihhlo tam tham tak hi Zokhawthar Police, Bulfekzawl Police, Hruaikawn Police (ruihhlo vai tur hrim hrima dah) leh Bulfekzawl leh Hruaikawn khawtlang chunga Mizoram Police chuan lawmthu an sawi.