Aizawl: BJP Mizoram President Dr K Beichhua chuan Dampa bial leh central an thlunzawm dawn tih sawiin, Dampa bial by-election lo awm turah BJP Mizoram candidate atan Lalhmingthanga a puang.
Thawhtanni khan BJP Mizoram chuan an party pisa. Mipui Run-ah karthar inhlanna inkhawm an nei a. He huna thusawitu BJP Mizoram President Dr K Beichhua chuan, Dampa bial hmasawnna turin theihtawp chhuah dawn tih sawiin, “Dampa bial mipuite mamawh leh tlakchhamna phuhru turin BJP chuan kan candidate kaltlangin hma kan la dawn,” tiin, Health sector, zirna leh kawng chhia chungchangah te, mipui mamawh thlensak ngei BJP chuan an duh leh an tum a nih thu a sawi.
Siaha bialtu MLA ni bawk Dr K Beichhua chuan, Dampa bial by-election lo awm turah Dampa bial mipuiten thlan tur dik an thlan a, bial hmasawnna tura ngaihtuahna fim tak seng tura chahin, “Party dangte chu kan hria a, Congress party kan en chuan central ah pawh tluchhe mek leh a bul nget mek a ni a. MNF lah kan hria a, opposition an ni mek a, ZPM en ila, kum khat leh thla kua chhung an sorkar kan hmu mek a, ZPM te kal dan enin mipuite an lungawi thei lo va, MLA ni mek bialte en pawhin hmasawnna thar han thlen hmuh tur a vang hle a ni. Chuvangin keini chuan Dampa bial leh central hi kan thlunzawm dawn avangin Dampa bial mamawh tak tak chu BJP MLA kan thlantlin chuan kan nei thei dawn a ni,” a ti.
Inkhawmah hian Dampa bial by-election lo awm tura BJP Mizoram candidate atana puan tak, Lalhmingthanga pawhin thu a sawi.