AZL: MNF Treasurer Lalruatkima chuan ZPM sorkarin FCAA hmangin Mizoram an hralh tih a sawi.
Thawhtannia Mizo Hnam Run inkhawmah Lalruatkima chuan MNF lungphum dik tak chu Mizo nationalism tun din a ni tih sawiin, Mizo hnam leh ram a him theih nan leh Mizo nationalism vawng nung a, chhem alh reng turin Zoram mipui a sawm.
Lalruatkima chuan Mizoram chu an thlahte chenna tlaka buatsaih leh ven him a tul tak zet a, hnam anga din chhuahna turin kawng an sahzau a ngai tih sawiin, “Kan pasaltha martarte thisen avangin Mizo hnam chu zahawmah kan lo awm ta a. Mizote thinlungah hnam tana martarte an nung reng dawn a ni,” a ti.
Mizo nationalism hi an innghahna lungphum a nih chhung chu an him dawn tih sawiin MNF treasurer chuan, “ZPM sorkarah hian kan ram hi a thlaphang a, a rum mek,” a ti a. ZPM sorkar chuan FCAA, 2023 hmangin Mizoram hralhah puhin, “ZPM sorkar a din tirh phat atangin an kutchhuak ni miah lo Lengpui Airport, ZMC Falkawn leh Serlui B Hydel project te hralh tumin an rel nghal a. Vai mihausa inneih a hmanpui denchhenin an zuar kual an zuar kual a; mahse, tun thleng chuan hralhna an la hre ta chuang lo a ni,” a ti bawk.
Lalruatkima chuan Mizoram hian hmasawnna an tih mai, infrastructure ropui tak tak hi an awtin an duh ngei mai a, Mizoram, hnam leh sakhua a him dawn em tih ngun taka ngaihtuah chungin, a that dawn loh emaw, a him dawn lo emawa an hriat chuan hmanhmawh mai lo tura an ngaihtuahna an hman a tul takzet tih a sawi.
“Mizote inhung bikna Article 371G ngei pawh sum leh pai, hausakna duh luat vangin an halral thil hlan atan an hmang mek,” tia sawiin Lalruatkima chuan ZPM sorkar kalphung en hian Zoram khaw var thlentir chu an hlat ta hle a ni. Chuvang chuan, Zoram mipuite hian Mizo nationalism hi development maichamah halral thil hlan atan an hlan ve a thian loh thu sawiin, kum 2028-ah Zoram kalphung siam tha leh turin MNF chu hnam rilru pu tlat chunga a sorkar leh ngei a tul thu a sawi bawk.