India chuan CAFA Nations Cup-ah result nei chhe lem lo mah se FIFA ranking chhuak thar berah a hma aia hmun khatin an tlahniam a, 134-naah an awm.
Tajikistan-ah CAFA Nations Cup an khel a, India hi a che tha thawkhat viau tho a, pathumna an ni.
Coach thar, Khalid Jamil kaihhruaina hnuaiah ram pariat inelnaah hian pathumna an ni a. Play-off an khelhah Oman chu penalty hmangin an hneh.
India hian October thlaah Singapore nen AFC Asian Cup qualifying an khel dawn a, an mual bakah an zin chhuakin an khel dawn bawk.
European champion Spain chu ranking tharah hian a chung berah an awm a, kum hnih chhung pakhatna ni tawh, Argentina dinhmun luah thin chu an luah ve ta a. Argentina hi pathumnaah an tla a, pahnihnaah France an awm.
World Cup 2026 qualifying khelh mekah Spain hi an che tha hle a, Bulgaria chu 3-0 in an hneh phawt a, chu mi hnuah Turkey chu 6-0 ngawtin an hneh a, dinhmun sang ber hi an luah theih phah a ni.
World champion leh European champion an nih tum, June, 2014 a pakhatna an nih hnuah Spain hian dinhmun sang ber an luah leh hmasak ber a ni.
Argentina hian World Cup qualifying-ah Ecuador an hneh lo a, hei vang hian an tlakhniam phah a, a chungnung ber an nih theih tawh loh phah a ni.
England chu palina niin, Portugal pawh panganaah an chho va. An hnuai chiahah hian Brazil awmin Netherlands chu pasarihna an ni a. Belgium chu pariatnaah awmin, an hnuaiah hian Croatia leh Italy te an awm ve bawk.
Ranking tharah hian Slovakia chu hma sawn nasa ber an ni a, a hmaa an awmna aia hmun 10 zeta sangah an chho va, No. 42 an ni a. Hetiang taka an dinhmun a san chhoh theih chhan chu 2-0-a Germany an hneh vang kha niin, Germany ve thung hi chu a hmaa an awmna aia hmun thuma hniamah an tla a, world champion hlui hi 12-na an ni.
Canada pawhin an thlen san ber tum an tawng a, 26-naah an awm a, Sweden hnehtu, Kosovo pawh 91-naah an awm bawk a ni.