Aizawl: MZP president thar, Dr C Lalremruata chuan Mizo hming hawha hnam dang sumdawng chungah dan anga hmalak an tum thu a sawi.
MZP hruaitu thlan tharte chuan mawhphurhna an la tan a, MZP Conference Hall, MZP Pisa Puiah Thawhtanni khan a hlui leh tharten charge an inhlan.
Hruai chanvo inhlanna inkhawmah president thar chuan zirlai pawl an nih angin zirna leh a kaihhnawih chu an term chhunga an ngaih pawimawh hmasak ber tur a nih thu sawiin Mizo zirlaite tan chak lehzuala din an tum thu a sawi a. MZP chu pawl thianghlim a nih angin an hruaitu hlui, political party-a awm tawhte chu an inthlanah inrawlh tawh lo turin a ngen.
MZP president thar chuan Mizo hming hawha hnamdang sumdawng an tam thu sawiin, heng mite hi ram leilung fate hmelma an ni a, MZP chuan dan anga hmalak an tum thu a sawi a, ILP thlengin Mizo hnam him nan nasa zawka hmalak an tum bawk.
Ruihhlo do tura theihtawp chhuaha tan lak a ngai tawh tak zet tia sawiin Dr C Lalremruata chuan, zirlai pawlte chu an zirlaipui leh thalaite ruihhlo laka an him theih nan an theihtawpin an thawk dawn tih a sawi a. Hna lak chungchangah pawh a tling leh tlakte chauh la tura sorkar ngen nawnin, MZP chu an dinna ngaiah an ding reng thin dawn tih a sawi bawk.
Hmun hrang hranga Zofa awmte inngeih taka awm turin president thar chuan a ngen nawn a, zirlai pawl chu an inpui a ni tih hre thar turin a chah.
Hruaitu hlui leh hruaitu thar mawhphurhna inhlan hun hi Ricky Lalzawma, Secretary, MZP Election Commission, 2025 chuan kaihruaiin president chhuak ta leh adviser-ten thu an sawi bawk.