Denmark leh Norway ram chuan drone rinhlelhawm an hmuh avangin Thawhtanni tlai khan an thlawhna tumhmun lian berte an khar a; mahse, rei khar lovin Thawhlehni khan an hawng leh tawh.
Danish police-te chuan Copenhagen Airport leh a chhehvela an drone hmun zat an sawi thei mai lo va. “Drone hi khawi atanga lo thlawk nge hriat a ni lo va, khawi lam nge an pan pawh hriat a ni lo,” tiin Deputy Police Inspector Jakob Hansen chuan a sawi.
Copenhagen tumhmun hi darkar li dawn khar a nih hnuah Thawhlehni zing dar 12:30 (India-a zing dar 04:00) atang khan an hawng leh tan a. Oslo tumhmun pawh darkar li chuang khar a nih hnuah an hawng leh tawh bawk.
Thawhtanni tlai khan drone lian tak pahnih thum vel Copenhagen Airport chhehvelah hian hmu a ni a, thlawk chhuak tur leh lut tur tihtawp a nih phah a ni.
Thuthar lakhawmtute Russian-te thlawhtir a nih em tih an zawh chu Hansen-a chuan a chhang thei lo.
Oslo-ah pawh drone pakhat hmuh a ni tih Norwegian police-in an sawi a. Tumhmun chung boruak khar nghal a ni tih an sawi.
Tun hnaiah Russia chuan a drone-te chu EU ram chungah a thlawhtir ta zeuh zeuh va, tun tuma mi hi an tih a ni em tih erawh finfiah a la ni lo va, engmah an la sawi lo bawk.