Bihar state inthlan chu November thla chawhma lam tura ngaih a ni ta deuhin a lang a. State hrang hranga bye election hi inthlanpui nei tur state an awm chuan an rualin an inthlan tir tlangpui a. Chuvangin keini state a Dampa bial ruak pawh hi November thlaah a beisei theih ngei a rinawm.
Inthlan puan la ni lo mahse party hrang hrang chuan candidate siamin campaign an bei ngawrh nghal hle a. Candidate te pawh mahni inah an awm hman ta meuh lo. Inthlan hi election commission lam thu a ni a. Kan party boruak chhiat lai leh that laiin awmzia a nei lova. Kan inthlang ngei dawn a ni tawp mai.
Inthlan hmachhawn dawna boruak duhawm vak lo tunlai hian sorkar sawiselna leh lungawi lohna thawm a ring viau mai a. Sorkar sawiselna thawm a lo ring hi thil mak tak mai, kan state a sorkar siam tawh ten an tawn zen zen loh a ni. Sorkar kaltateah khan sorkarna an siam atanga kumhnih thum hi chu sorkar sawiselna thawm leh nawrhna tih vel a awm vak ngai lova. Lungawi lohna thawm hi sorkar term tawp lamah a ni tlangpui thin. Mahse, tunah hi chuan CSS hnathawkte nuarin kan ram titi a luah mek thung a. Hei hi ruling party tan a tha lo hle a ni. Tin, kan sorkar chu mahni thutiama ding lo a, mipui phatsanah an puh nasa hle bawk.
Tunhma a awm ngai lo engatinge hetia lungawi lohna thawm a rin tih hi ngaihtuah uluk a ngai hle. A chhan ber nia lang chu kan sorkar hrawn mek hian inthlan dawn lai khan mipui hnenah thil tih harsa leh tihhlawhtlin loh tur an tiam tam lutuk niin a lang. Kohhran atang pawha tihhlawhtlin hleih theih loh tur, mihring ten kan tlin hauh loh tur duhsak bik neih hauh lohte kan han intiam vak vak mai kha, kan thusawiin min vaw let a ang ta hial. Thusawi duhthawh lutukte hi a him lo a ni tih hria ila. Kan political party te hian duhthawh taka midang demna te hi anmahni vaw let tu a nih palh hi hlauh nachang hriat nana hmangin inzir nan hmang se. Intiam vak vak, kan ram sum leh paiin a tlin hauh loh sawite hi sim nan hmang ila. Kan party policy leh thil tum sawi hi a tawk viau. Dampa bialah hi chuan a hma aiin thusawiah intiamna lam hi ri nep deuh se kan ram hian a hlawkpui zawk ngei a rinawm.