Aizawl: Dampa bial by-election atana MNF official candidate Dr. R. Lalthangliana chuan MNF sorkar hunah kawlphetha chhit man leh buhfai man ennawn leh an tum thu a sawi.
MNF Sr Vice President Dr R Lalthangliana chuan Thawhlehni khan Silisuri Soituh-ah MNF Block Meet a hman pui a. Thusawiin, Dampa bial by-election-ah thlan tlin a nih chuan Dampa bialtu hlui, Lalrintluanga Sailo hma lo lak tawh leh hnathawh kal mekte chu chhunzawm zel a tum thu a sawi.
Silsuri pawh sikul tihchangtlun zel an mamawhna a hriat thu sawiin Dr R Lalthangliana chuan, “Higher secondary school neih in phu ve tawh hle a, in 1,000 chuang in ni ve tawh; thlan tlin ka nih chuan theihtawpin hma ka la ang. Field tihphuisui leh thalaite infiamna tur tha zawk Dampa bial chhung khaw hrang hrangah hian in mamawh hle tih ka hmu a, chu bakah thalaite eizawnna tur kawng hrang hrangah thlan tlin ka nih chuan theihtawpin hma ka la ang,” a ti.
Dr. Thangtea chuan heng lai vela inkalpawhna kawngchhe lutuk te hi siamthat ngei ngei a tul thu a sawi a. “Bangladesh commerce minister-te nen helicopter-a kalin, he lai hmun Silsuri-ah hian kan en dun tawh a, official-a tihfel thawkhat tawh, Bangladesh sorkar tluk tak vanga buai ta kha thlan tlin ka nih chuan ka umzui zel ang,” a ti bawk.
Hmunphiah hralhna tur awm mumal lo leh a man tlawm lutuk chu pawi a tih thu a sawi a. kawlphetha chhit man to ta lutuk eng tha bawk silote hi a tuartu chu mi retheite bawk an nih thu sawiin, buhfai man a let thawka to te nen MNF sorkar hunah ennawn leh an tum thu a sawi bawk.