Aizawl: Aizawl Municipal Corporation (AMC) huam chhunga ward 19-te Draft Electoral Rolls chu nimin khan mipuite en theih turin tar chhuah a ni a, vote nei zawng zawng 2,34,600 an ni a, mipa aia hmeichhe tamna vote 17,302 a ni.
Draft Electoral Rolls tihchhuah tharah hian Ward 19 zingah Ward XVIII chu vote tamna ber niin vote 18,779 a awm a, mipa 8,697 an ni a, hmeichhia 10,082 an awm a, an inthlauhna 1,385 a ni a, he ward-ah hian Salem Veng, Venghnuai, Model Veng, Thakthing, ITI, Dam Veng, Mission Veng leh Tuikhuahtlangte an awm.
Armed Veng, Armed Veng South leh Chite Veng te awmna Ward VIII chu vote tlemna ber niin vote 7,698 a awm a, mipa vote 3,559 leh hmeichhia vote 4139 an awm. Ward XVIII-ah hian Ward VIII let aia tam vote a awm.
Chaltlang, Chaltlang Lily Veng, Bawngkawn leh Bawngkawn South te awmna Ward II chu vote tam lama pahnihna an ni. Zemabawk, Zemabawk North, Falkland leh |huampui te awmna Ward VII chu vote tam lama pathumna an ni.
Dawrpui Vengthar, Vaivakawn leh Kanan te awmna Ward XIII chu vote tlem lama pahnih an ni a, Chanmari West, Edenthar leh Hunthar awmna Ward VI chu vote tlem pathumna an ni.
AMC hnuaia Ward 19-ah hian hmeichhia aiin mipa tlemna ward pakhatmah a awm lo. Ward zingah hian vote 10,000 tlin lohna ward pathum a awm.
Tun tum AMC Draft Electoral Roll hi MLA Roll 2022 behchhana siam a ni. September 25, 2025 atanga October 25, 2025 thleng Electoral Roll atanga hming paih, thun thar, siam that ngai leh insawn duhte tan dilna, Local Level Officer (LLO) hnenah theh luhna hun hawn a ni ang.