Hmasawnna lamah khawvel hi a intlansiak mup mup a. Mahni ram tan thil engkim an chuh a. Khawvel ke pen ruala pen ve loh hlau a an intlansiakna lamah ram leh ram an in ep hial thin a nih hi. Chutiang chiah chuan India ramah pawh mahni state tan kan lo intlansiak ve mek bawk. Hmasawnna awm theihna lai chu chan tumin thiltihtheihna hmun ber Delhi ah khuan an insulpel hut hut a. India ram bikah phei hi chuan hnam hrang hrang awmkhawm kan nih avangin kan rilruah in elna /inerna a na zual. Keini bik hian chang vek ila ti ang mai hian thil tha hi an chuh nasa a, engkim mai hi chan a har em em a. Kan ram hruaitute kan sit phah hial thin anih hi.
BJP sawrkar pawhin India hmasawn tir a tumna kawngah ruahmanna a siam tam em em a. Kum 2047 a India in kum 100 a tlinna turah hian khawvel ram hmasawn/ changkang ber pathumna nih a tum a. Hetianga hmasawnna a ruahmannaah India hmarchhakah thalaite tan industry leh thiamna inzirna tur MSME hnuaiaah pakhat awm se a ti a. Chu hmunpui chu chan tumin kan MLA pakhat Lalmuanpuia Punte hian a MLA nih tirhte atangin a bei nghal chat a. Assam chief minister thiltithei tak Himanta Biswas chuan Assam chu India hmarchhak engkim maia tlankhawmna a ni a, he center hi Assam-ah a awm tur a ni tiin nasa takin a bei bawk. Hetiang karah hian kan ram MLA pakhat Lalmuanpuia, Hrangturzo bialtu hmalakna chu a tlang ta purh mai a. A va lawmawm em. Hetiang ang hmasawnna atana pawimawh chang tur hian thil namai a ni lova. Biak thiam tur tam tak an awm ang tih chu a hriat reng mai. A beitu hian a atchilh a, kan thalaite tana a pawimawhna a hmu phak a. Sut ngai a su tam ang tih pawh a hriat reng mai.
Kan politician te hi MLA a thlantlin an nih hian hlawhtlinna an hmu tihna a ni a. Mahse hei hi mimal hlawhtlinna a tih theih a. Ram tana thil tha an tih hi hlawhtlinna tak tak chu a ni zawk. Hetianga thil ropui ram tana a hawn thei hi chawimawi tlak a ni a. Thil tithei, a ngaihna hria hi kan ram mamawh a ni. Sorkarna chelhtu kan hruaitute hian heng hi an hman tangkai thiam a ngai. Kan ram hruaitute hi sawisel an tulnaah chuan sawisel ila, ram tana hna an thawh thatnaah hi chuan fak hreh lo ila politics dik kawng pawh kan zawh ngei ang. Thil tha tihah pawh an in el ngei bawk ang. Mahni bial tan chauha MLA ni lo, ram pum hmasawnna thlir thei ni vek thei se tih hi duhthusam a ni.