Mizoram States Sports Council (MSSC) Golden Jubilee 44th Mizoram State Boxing Championship 2025 kal mekah mipat hmeichhiatna kaihhnawih thubuai leh he thubuaiin a kaihhnawih hmeichhe boxer pathumte khelhtir phal an ni lo nia sawi thu kal zelah MSSC chuan a buatsaihtu, Mizoram Boxing Association (MIZBA) chu puhnaah an insawi fiah hma chu inelna kalpui chhunzawm tawh rih lo turin a hriattir.
MSSC hian Nilaini khan MIZBA hnenah hriattirna pein inelna boxer teltir an phal lo nia sawi hi a dik lo a ni emaw, chhan tha tak vanga khelhtir phal lo emaw an ni tih insawi fiah turin a ti a, an insawi fiah hma chu inelna hi kalpui chhunzawm lo turin a ti.
Hmeichhe pathum tel ve phalsak loh chungchangah hian Thawhlehni khan Serchhip District Boxing Association (SEDBA) chuan thuchhuah siamin Thawhlehniah thutkhawm hmanhmawh an ko va. MIZBA hnenah khelhtir ngei tura ngenna lehkha an thawn tih an sawi.
SEDBA chuan Lunglei SAI Extension Center-a inelna neihah hian mipat hmeichhiatna rawngkaia boxer-te a khawih thin avanga POCSO case-a lung in tang mek, MIZBA Ring Official Commission (ROC) Chairman T. Lalthlengliana thlavang hauh vangin thubuai thehluttu boxer pathumte tel ve an phal lo niin an thu chhuahah hian an tar lang.
An tar lan dan chuan July thla tira Rohtak, Haryana-a 6th Junoir (U-17) Boys & Girls National Championship khelha Mizoram aiawha kal hmeichhe boxer palite chu anmahni hruaitu, MIZBA hnuaia ROC chairman hian an kal chhung leh an kal hmaa an camp laiin mipat hmeichhiatna hawiin a khawih fo nia sawiin an nu leh pate nen Child Welfare Committee (CWC)-ah an zualko va, T. Lalthlengliana hi manin Central Jail-ah dah a ni tih an tar lang.
An ROC lung in tang mek thlavang an hauh avangin MIZBA hian Lungleia inelna an buatsaihah hian a tel tur kal, thubuai thehluttu mi pathumte hi an inlan a phal ta lo niin an sawi.
Thawhlehni tuka inelnaa tel tum inbuknaah Aizawl leh Serchhip district atanga hmeichhe boxer kal ve pathumte hi ROC Chairman Rosema’n POCSO case an thehluh avangin MIZBA-in championship an khelh ve a rem tih loh thu a lo hrilh niin SEDBA thuchhuahah hian tar lan a ni.
Hetianga inpuhna a awm lai hian MSSC chuan POCSO case-a tuartu (victim) hmeichhe boxer-te khelh ve an phal lo nia puhna chungchanga CWC, Aizawl District atanga hriattirna an dawn bawhzuiin MIZBA hnenah Nilaini khan hriattirna thawnin puhna hi thu dik lo a ni emaw, chhan tha tak avanga khelhtir phal lo an nih emaw chuan insawifiah turin a ti a, an insawi fiah hma chu inelna titawp turin an hriattir ta a ni.
MSSC Golden Jubilee 44th Mizoram State Boxing Championship 2025-ah hian district hrang hrang atangin boxer 100 chuang an kal khawm mek a ni.