Aizawl: Union Jal Shakti Minister CR Paatil hnenah PHE Minister Prof. Lalnilawma’n JJM hnuaia hnathawhna bill tang rei lutuk chu pek chhuak thuai turin a ngen.
Thawhlehni khan Prof. Lalnilawma hian Union Jal Shakti Minister hi New Delhi-a a chenna inah kawmin, Jal Jeevan Mission (JJM) hnuaia Mizorama khua zawng zawng deuh thawa hmalak a ni chu lawmthu a hrilh a. Hetih rual hian, JJM hnuaia hnathawh zawh tawh bill tang rei lutuk chuan harsatna a thlen avangin sum hi pe chhuak thuai turin a ngen.
Union Minister CR Paatil chuan JJM chungchangah ministry level-ah chin fel ngai a awm a, theihtawp chhuahin an bawhzui thu leh a fel veleh sum hi an pek chhuah tur thu PHE Minister hi a hrilh a ni.
Minister Prof. Lalnilawma chuan Mizoram chu tlangram, ruahtui tamna a nih avangin a remchanna apiangah ruahtui khawlna siam a, tuihna siam thei tur kawr leh tlang kar khuahna siam a pawimawh em em tih sawiin, chutianga hmalakna tur project PHE Department-in a thehluh tawh pawh pe ngei turin a ngen nghal bawk.
Union Minister hian DPR thehluh tawh chu lo zirchianga a tih theih dan tur ngaihtuah turin official-te a hrilh tawh thu leh a lo bawhzuipui zel tur thu a sawi.