Aizawl: MPCC Treasurer Dr. Lalmalsawma Nghaka chuan ZPM sorkarin kawngpui enkawlna tura chhiah la mah se, tun hma zawng aiin Mizoram kawng a chhe hle zawk chu mipuite zah lohna lian tak a nih thu a sawi.
Sairang leh Vairengte inkar kawngpui bakah Airport panna Sihhmui kaia Tlawng lei dawh mek bul kawng dinhmun Ningania a enfiahnaah MPCC Treasurer chuan, sorkar kal tawhten mipuiin sum lamah harsatna an tawh nasat dawn avangin kawngpui enkawlna tura chhiah an lak ve ngai lohna, road maintainace cess chu mipuite hnen atangin ZPM sorkarin la mah se, tunhma zawng aiin Mizoram kawng hi a chhe hle zawk tih sawiin, “Hei hi mipuite zah lohna lian tak a ni,” a ti.
Dr Lalmalsawma Nghaka chuan Congress sorkar laia Aizawl leh Kolasib inkar darkar hnih vel tlan ni thin kha, tunah chuan tlang kawng (via Siphir) atanga Kolasib kal tur pawhin lirthei te paw’n darkar ngate hun hman a ngai ta hial tih a sawi a. Sairang lam atanga kal lirthei liante phei chu ni eng emaw zat an tangkhang hial a ngai ta zel mai tih a sawi a. Kawng a chhiat avangin zin veivak miten harsatna namen lo an tawh mek bakah bungraw phur lirthei vuantute an khawngaih thlak zual hle, ruah a sur hlekin kawng nal avangin kal hleih theih loh hial khawpin kawng hi chhia tih a sawi.